Wever: Kier introduci Fase 2 di Reforma Fiscal pa 1 april 2020

ORANJESTAD – Gobierno su intencion ta pa introduci un serie di cambio fiscal entrante 1 di april 2020. Prome minister Evelyn Wever a bisa noticiacla.com dialuna cu esey ta e ‘streefdatum’, pues no ta sigur si ta logra haci esey, pero cu esey ta e deseo si. Inicialmente mester a introduci esaki for di 1 di januari ultimo pero no a keda cla y a opta pa warda cu su introduccion. E lista ta contene por lo menos 10 medida cu gobierno kier introduci cu e intencion di genera mas entrada den su caha. Hopi di nan, si no ta tur, ta stipula caba den e presupuesto 2020 como entrada. E reforma a conta cu resistencia formal di parti di Raad van Advies y tambe instancianan priva financiero. 

LEY 

Segun Wever na e portal aki, OB2020 (e presupuesto) y reforma fiscal ta dos ley apart. “Pero e inkomsten di e reforma ta hinca si den e begroting” Wever a sigui bisa. Ta conoci cu ambos ley tin cu pasa awor. Den un reaccion breve pa e portal aki, minister encarga cu finanzas Xiomara Maduro a bisa cu e ley di e fase dos di reforma fiscal no mester pasa promer. “ Nan por wordo trata hunto tambe”. Pero e tambe ta bisa (mescos cu colega minister Wever) cu tin entrada den e presupuesto cu tin cu bin for di e reforma fiscal. A compronde cu e intencion ta pa durante tratamento di presupuesto, trata e ley aki tambe, y finalmente pasa ambos prome cu 1 di april proximo. Lesa e ley y e comentarionan di entre otro RvA y e contesta di gobierno riba esey AKI.