Mundo di droga ta haya sla formal cu captura di 200 kilo

WILLEMSTAD - Mundo di droga ta haya sla formal cu captura di 200 kilo. Diadomingo marduga Warda Kosta a notifiká moveshonnan straño ku tabata tumando lugá den e area di Spaanse Water. Mientras tantu ku unidatnan polisial tabata dirigiendo nan mes pa e sitio, personal di Warda Kosta a interseptá un kantidat di 8 bulto na Kabrietenbaai. Nan a tuma nota na e momentu ei tambe di un boto ku a sali ku velosidat haltu for di Spaanse Water. Kontinuando ku e investigashon, na Caracasbaai polis a para un vehíkulo, den kua tabatin 6 hòmber nasé na Kòrsou. Ta trata di e sospechosonan C.S (21), R.S. (40), L.A. (26), G.S. (24), L.A. (30) i C.K. (41). Tur 6 a keda detené pa mitar di 10 di mainta.

Tambe a konfiská e vehíkulo den kua e sospechosonan tabata move. Mas o menos 10’or di mainta polis a bin detené den bisendario di Directeursbaai e di 7 sospechoso, e homber H.S., di 54 aña di edat. Mas lat, Warda Kosta a konfiská un boto ku registrashon lokal. E 8 bultonan ku a keda konfiská tabata kontené 182 paki di kokaina ku a suma un total di 212.4 kilo i un paki konteniendo 1160 gram di mariwana. Tur e 7 sospechosonan a keda enkarselá i e investigashon den e kaso aki ta kontinuá.