Wever riba Reforma Fiscal: Kico cu haci, lo afecta un of otro hende

ORANJESTAD-  Ki paso cu gobierno tuma, pa genera entrada, ta bay afecta un of otro hende. No por otro. Asina premier Evelyn Wever a bisa noticiacla.com riba e efecto di e di dos fase di reforma fiscal cu gobierno kier introduci entrante 1 di april proximo. Ademas Wever a reacciona riba e ‘reaccion’ di tanto e compania priva BDO (conseheronan fiscal) , Raad van Advies (RvA)  y AHATA pa cu e fase dos di e reforma fiscal. Practicamente tur e gruponan menciona, reaccion no tabata nada positivo pa cu e contenido di e reforma aki. Algo cu Wever ta compronde pero ta mustra cu no por haci otro. 

CONTENIDO RAPPORT DI RVA Y BDO

Wever (riba pregunta di noticiacla.com) a cuminsa na bisa cu e no conoce e contenido di e rapport di BDO. Loke si e por bisa ta cu BDO ta un compania priva di duna conseho fiscal. Y como cu e (Wever:red) tambe tabata un consehero fiscal, ora cu traha tipo di cartanan asina, esaki ta pa yuda e clientenan. “Dus, ora cu un hende ta skibi algo di interes Aruba versus un otro hende ta skibi algo den interes di un cliente, nunca bo ta bay haya e mesun idioma” Wever a bisa, como aclariacion. Pa loke ta RvA, Wever a bay mas den detayes pasobra e rapport ey si e conoce. 

RAPPORT RVA

Segun Wever, RvA a traha conseho riba tanto presupuesto como e parti di reforma fiscal. A mustra riba e preocupacion cu nan (RvA) no tabata di acuerdo cune y sugerencia. Gobierno a reacciona riba esaki tambe y a mira kico RvA por a ‘interpreta diferente’. Wever a mustra na e mas di 40 pagina di clarificacion cu a duna riba e reforma. E no a haci mencion specifico di AHATA pero a referi na nan indirectamente ora cu a trata e tema di IPC (tarifa preferencial di impuesto).

CON E TA AFECTA COMUNIDAD

A puntra e mandatario specificamente tambe, con e ciudadano comun mester interpreta e reforma y con e ta bay afecta su persona. “Ta hopi importante pa remarca cu kico cu nos haci, ta afecta un hende” Wever a cuminsa na bisa. Esaki pasobra mester haya placa di un forma, ya cu e no ta bay ‘cai foi shelo’. Pues tin cu haye di un caminda y e caminda cu dicidi pa sak’e, ta bay afecta e persona of grupo di persona ey. A mustra cu mester cera e gap financiero, y ta haci esaki cu entrada y gastonan. A sigura cu ta tuma tur conseho di baha gasto, na serio. E no por bay den cantidad mas grandi pareu, pero e ta bayendo segun Wever. “Nos ta trahando pa baha gasto y aumenta entrada structuralmente”. A papia di un gap financiero grandi cu mester a yena y a resumi tur e retonan (sumanan) cu mester a cubri. Ta considera e paso di 2019 pa 2020 uno grandi. “E gap mester wordo cera di un caminda. E caminda (di cual e ta bin) ta haci dolor. E por haci dolor na un ciudadano, of na tur ciudadano. Y si e haci dolor na un inversionista, un hotel, y bo ta haya cu su representante, no manera BDO pero un otro manera BDO, ta bay bisa cu esaki ta fatal pa Aruba, bo mester mira cuanto hende e ta afecta” Wever a sigui splica. 

ELIMINA IPC

Un di e criticanan grandi segun Wever cu ta scucha pafo, ta cu gobierno kier elimina e IPC. Esey ta e Imputation Payment Company. E ta un sistema cu a keda introduci tempo cu Aruba a elimina Tax Holiday. E ta un tarifa preferencial pa hotelnan, unda cu enbez di paga 28% cu tur compania tabata paga, nan tabata paga 2%. A baha e tarifa di 28 pa 25% pa henter Aruba pero nan (Hotelnan) a keda paga 2%. Aworaki gobierno a bisa cu no por sigui asina. Ta considera cu Aruba ta atractivo pa inversionistanan di hotel, y ta bringando pa haya mas hotel. Como tal gobierno ta razona cu no mester duna nan mas incentivo. “Nos ta evaluando pa elimina e tarifa preferencial. Y si elimine, por baha e tarifa pa tur hende” Wever a bisa finalmente riba e tema. Lesa e pakete di reforma fiscal AKI.