Na Corsou, a para huramentacion di Steven Martina como minister

WILLEMSTAD – Na Corsou, a para e huramentacion di Steven Martina como minister, te dia 22 di mei proximo. E intencion tabata pa dia 11 di maart e huramentacion aki tuma lugar. Pero esaki a keda para ultimo ora. Segun version di gobierno, ta mustra cu ‘den consulta cu Gobernador y cu candidato pa Minister di Desaroyo Economico, dr. I. S. Martina, a fiha e fecha di huramentashon pa 22 di mei 2020’. Indicacion tin cu periodo di prueba di Martina despues cu OM a nombre como sospechoso aña pasa, ta vence pa e fecha ey. Y cu pesey Gobernador a opta pa wanta e huramentacion di Martina. Otro informacion tin cu mientrastanto tin otro keho a drenta contra Martina na OM. Tur esaki ta pone cu actual minister Giselle Mc WIliam lo no retira awe mas como minister sino te despues.