Wever: Si no aproba presupuesto 2020 pa 1 april awo, tin problema

ORANJESTAD – Si presupuesto di Aruba pa 2020 no ta cla y aproba pa 1 di april proximo, gobierno di Aruba ta den problema. Sigur si no tin un bon splicacion pakico esaki no ta cla. Asina prome minister Evelyn Wever a contesta noticiacla.com dialuna durante un conferencia di prensa. E ta di acuerdo cu por spera problema e.o. di Hulanda si gobierno di Aruba no por hustifica e tardansa extra aki (e presupuesto mester tabata cla y aproba pa 15 di December 2019). Problema den forma di p.e. un aanwijzing. Pa ley, e presupuesto mester ta na Parlamento pa 1 september di e aña anterior, y aproba prome cu e fin di aña. "Sino pa ley nos por haya un aanwijzing", Wever a recorda dialuna. 

CAFT

Wever a reconfirma tambe cu ta e colegio di supervision financiero CAFt ta esun cu a haci mencion di e fecha aki (1 april 2020) durante nan ultimo bishita na Aruba pa cual mas tarda nan kier wak e presupuesto aproba.  

COMPROMISO

E prome mandatario a bisa cu a compromete cu parlamento cu mientras cu e prespuesto a keda entrega caba na Parlamento, cu si Parlamento yama durante e periodo di preparacion, pa un commission pa haya aclariacion riba esaki, cu lo contesta tur esaki mas liher cu ta posibel pa no stroba e proceso. Noticiacla.com a compronde cu Parlamento tin te mitar di luna di maart pa manda pregunta aden pa gobierno riba e presupuesto, pa despues gobierno contesta esaki. Unabez cu nan ta contesta, e tratamento di e presupuesto por cuminsa.