Venezolanonan mester visa pa drenta Aruba for di april

DEN HAAG – Entrante 1 di april proximo ciudadanonan Venezolano cu kier biaha pa Aruba (y tambe Corsou, Bonaire, St Maarten, Statia y Saba osea Caribe Hulandes), ta rekeri un visa. Asina gobierno di Reino ta informa oficialmente riba nan portal. Tin cierto rekisito pa cumpli cu ne, y tambe tin un periodo di transicion. Tur esaki ta wordo splica riba e mesun porta. Mientrastanto minister di husticia di Aruba Andin Bikker a confirma e fecha aki tambe pa cu e caso aki. 

TRANSICION

Si un Venezolano ta biaha pa e paisnan menciona entre 1 y 30 di april proximo, por drenta sin visa, y tambe si e keda despues di 30 di april. Pero pa esey tin condicion. Wak e condicion AKI. 

KEN NO MESTER VISA

Esnan cu no mester di visa y tin un visa di multiple entrada of un permiso di residencia di un pais Schengen, Reino Uni, Irlanda, Merca of Canada, no mester di un visa di estadia cortico. E lista completo di situacion cu no ta rekeri visa, por mira AKI. 

SOLICITA VISA

Entrante 1 di april, por solicita e visa den e oficina di gestion di visado di VFS Global. Por haci un sita online y wak e documentonan rekeri riba e pagina web di VFS Global. E cantiad di cita ta limita, y e tramite di e solicitud ta tarda por lo menos 15 dia. 

VISA

E motibo pa visa ta pa tin miho control riba e fluho di Venezolano pa e region aki, mirando e situacion cu a surgi na e pais bisiña y e influx di persona di e nacionalidad ey cu ta creando un problema di imigracion pa e paisnan aki.