Premiernan ta celebra 60 aña Statuut na Corsou enves di Hulanda

ORANJESTAD / WILLEMSTAD – Prome Minister di Aruba Mike Eman, hunto cu homologonan di Corsou y St Maarten a opta pa ‘skip’ Hulanda y scohe Corsou como e lugar pa celebra 60 aña di statuut di Reino Hulandes. Mientras cu Aruba ta sigura cu esaki no ta un boycot, no por bisa mescos pa Corsou y St Maarten, pasobra no a haya nan motivacion pa e cambio aki. Dialuna mainta 9’or tin e celebracion oficial na Corsou, y a scohe e monumento historico di Autonomia na Fokkerweg pa haci esaki. Akinan hunto cu prome ministernan di Corsou y St Maarten, Eman lo celebra esaki, enves di biaha pa Hulanda pa e Dia di Reino cu lo keda conmemora pa medio di e concierto annual di Reino. Prome Minister di Aruba Mike Eman, den su discurso, a manda palabranan positivo pa un Reino uni. El a recorda e lidernan cu a lucha tempo cu nan a conoce opresion y a señala e lucha cu y ta wordo hiba mester por ta inspiracion pa dirigentenan na e otro banda di lama.

Prome minister Eman a biaha diadomingo anochi pa Corsou, pa ta presente dialuna mainta 9’or na inicio di e ceremonianan menciona. Na e momento ey, e la te hasta pose pa potret cu e crew nobo di Insel Air prome cu biaha pa e isla ruman. E la post e potret riba su pagina di facebook tambe. E monumento di autonomia, cu e texto conoci ‘Steunend op eigen kracht, doch met de wil elkander bij te staan’, ta uno cu ta simbolisa e 6 islanan di ex Antiyas Hulandes, tipifica pa 6 pahra bulando apart, pero uni cu e mesun meta. Esey ta e area mas apropia cu a uza pa por celebra e momento historico aki dialuna na Corsou.

Tabata diabierna ainda cu NoticiaCla. com a raporta cu e hecho cu Eman a opta pa no ta na Hulanda, no mester wordo considera como un boycot. “E no ta un boycot” un fuente serca di Eman a sigura NoticiaCla.com e momento ey. E motibo duna tabata uno diferente. “Ta simplemente cu e circumstancianan actual, ta rekeri pa nos re-focus y ahusta prioridadnan” e fuente a sigura NoticiaCla.com. E pregunta a bin despues cu for di Hulanda, tabatin mencion di un boycot ora cu e revista popular y reconoci Elseviers a raporta cu tin un boycot di tres prome minister di Reino, pa no presenta na Hulanda e aña aki pa mustra nan rabia riba e forma con prome minister hulandes Rutte a trata Aruba y St Maarten recientemente. Aruba pa e KB, y St Maarten pa e medida contra e.o. screening di candidatonan pa gobierno nobo di St Maarten. Fotonan cortesia Telecuracao.