LaSorte: Turismo di Aruba a cuminsa sinti efecto di coronavirus

ORANJESTAD – Aruba a cuminsa sinti e efectonan di e coronavirus caba, aunke cu no tin ningun caso di e virus mes registra riba nos isla. Asina e CEO di AHATA Tisa LaSorte a confirma pa noticiacla.com den e programa NoticiaCla LIVE. Segun LaSorte, e reaccion cu e ta hayando di e miembronan di Aruba Hotel & Tourism Association, ta cu turistanan a cuminsa cancela nan biahe pa Aruba of a pospone esaki temporalmente. E no por bisa cu cifra cuanto esaki ta, pero si cu e no ta un cantidad dramatico ainda. No a specifica tampoco si ta turistanan di cua parti di mundo ta actuando asina. 

RAPPORT

Segun LaSorte, e turistanan ta sea pospone nan biahe, pendiente kico ta sosode cu e virus, of ta cancela nan vacantie pa Aruba completamente. Tin rapport cu AHATA su CEO ta ricibi unda  cu hotelnan ta ripara cu no solamente cu tin hende cu ta cancelando, pero cu e cantidad di bookings ta bahando, ta slow down. “Ta manera hende ta wardando of a stop di book pa futuro pa e siguiente lunanan. E accion aki ta specificamente pa coronavirus, aunke tin otro factornan tambe cu ta pone un persona cambia su patronchi di biahe. 

PREPARA PA CAMBIO

LaSorte a bisa caba algun tempo pasa cu fuera di coronavirus, tin un situacion cu ta desaroyando unda cu otro destinacionan den Caribe cu no tabata activo pa un tempo debi na daño causa pa horcan, aworaki ta ‘bek in the picture’ cu ta pone cu turistanan tin mas alternativa fuera di Aruba. Tin hopi mas camber di hotel ta habriendo den region, cu ta pone cu Aruba tin cu competi mas awor pa haya e turistanan ey tambe. “E competencia ta birando hopi mas grandi” LaSorte a bisa. A mustra cu e aña aki tin cu ‘bringa’ un tiki mas pa logra haya e turista pa bishita nos isla.