Minister no a keda contento cu OM su decision pa caso di pedofiel Mericano

ORANJESTAD – Minister di husticia Andin Bikker no ta contento cu e decision di ministerio publico unda cu a laga e turista Mericano acusa di pedofiel den libertad via un Tom zitting. Durante un conferencia di prensa di gobierno diahuebs mainta, Bikker a mustra su desaprobacion y mesora tambe su intencion di entrega un cambio di ley pa por cambia reglanan di Tom zitting. E cambio basicamente mester regla cu den futuro, no por usa un Tom zitting pa asuntonan di e.o. pedofiel.

E CASO

E caso ta trata un Mericano di edad cu durante su vacacion na Aruba den laman a haci actonan di pedofiel cu un mucha muher, pa cual famia di e mucha muher a protesta, yama polis cu consecuencia cu e homber a keda deteni mesora y encarcela. Pero despues di algun dia, conforme cu regla di maneho di OM, e persona por a recobra su libertad caba y bay Merca bek.  E hecho cu e persona aki por a bay cas (Merca) y paga un boet, no a cay bon den comunidad y e mandatario tambe no ta contento cu e decision aki. Mesora a bin e pregunta di prensa cu si ora cu un ciudadano di Aruba tambe cay cera pa esaki, e tambe por recobra su libertad pa medio di un Tom zitting. E mandatario a bisa cu e cambionan cu tin, lo elimina e posibilidad ey. 

KICO TA TOM ZITTING

Un Tom zitting ta un procedura unda cu un fiscal por duna un sospechoso un trabou comunitario of multa como castigo, of un combinacion. TOM ta corto pa ‘Taakstraf Openbaar Ministerie’. E ta un forma liher pa procesa casonan cu no ta rekeri un caso completo. Den e caso aki, den comunidad no a compronde con bin un persona cu ta sospecha y deteni pa actonan pedofiel, ta haya e chens aki.