Segun OM, decision pa laga Mericano pedofiel den libertad ta conforme regla

ORANJESTAD - Ministerio Publico a ripara cu prensa tin preguntanan tocante un decision recien den caso di un sospechoso Mericano di un caso di zeden (pedofiel), cu tabata na Aruba como turista. Asina e vocero di ministerio publico Ann Angela ta bisa den un comunicado. E caso ta uno unda cu polis a detene un turista Mericano pa a haci actonan di pedofiel cu un mucha muher chikito na Aruba. A detene e persona y awor riba orden di Ministerio Publico, a lague den libertad. Algo cu a causa rabia den comunidad. 

DECISION 

Segun e comunicado, e decision di Ministerio Publico (di laga e homber liber) a wordo tuma conforme e richtlijnen (liñeanan di maneho) di Ministerio Publico pa loke ta delitonan di zeden. “Delitonan leve di zeden ta bin na remarke pa un asina yama TOM-zitting. Den un TOM-zitting Ministerio Publico mes ta dicidi, debi na e seriedad menos pisa di e hecho, tocante un caso. Ora ta trata di turista esey ta hiba mayoria vez na transaccion. Ora di dicidi tocante un TOM e seriedad y tipo di e sospechoso ta wordo pisa enfaticamente” e comunicado ta finalisa bisando.