Estado di e planta di purificacion di awa na Bubali ta deplorable

ORANJESTAD – Trabounan a inicia diahuebs na e planta di purificacion di awa, esta e Riool Water Zuivering Instalatie (RWZI) pa drecha esaki, debi na e situacion deplorable den cual e planta ta actualmente. Den un conferencia di prensa di gobierno diahuebs mainta, minister encarga Marisol Lopez Tromp a hustifica e urgencia pa cual a cuminsa cu esaki. 

MAL ESTADO

Entre e puntonan di mal estado, tin e nivel di e beton di e lugar. Segun director di DOW Marlon Croes, ora cu a test e nivel di beton, esaki a sali malo. Ora cu a haci e.o. e ultrasound test, esaki a bay fatal, nificando cu e zonido a bay door en door, pues tin buraco serio den e beton, y cu e beton ta practicamente putri. Si no haci nada, tin e chens cu e planta por cay den otro y e cantidad di awa eyden por bay plama pafo, cu tur e consecuencia pa medio ambiente. Ta papia di 8 mil ton di awa cu ta bin na e sitio diariamente. 

HISTORIA

Segun Croes, e planta ta 48 aña bieu y ta yegando su ciclo di bida cu ta 50 aña. Esey kier men cu entre awor y 2 aña, cualkier momento e beton p.e. por laga bay y crea un buraco y un problema higienico. Ademas a traha e planta pa un cantidad di proceso di awa pa purifica pero e cantidad a surpasa e maximo caba. Como tal, esey ta nifica cu e nivel cu ta wordo purifica ta apenas 40% compara cu e 90% cu mester keda purifica. Aworaki ta cuminsa cu trabounan pa optimalisa e planta pa e por keda funciona di un forma responsabel atrobe.