Australia kier extradita Colombiano deteni na Aruba pa asesinato di dama

SYDNEY – Recherche di Australia ta na caminda pa busca un Colombiano di 20 aña deteni na Aruba, sospecha di a mata un dama di 69 aña den su apartamento na Sydney Australia na januari di e aña aki. Asina e portal Brinkwire ta raporta. E Colombiano ta un studiante cu lo a hui pa Colombia y despues Aruba despues di a comete e asesinato. E dama victima, tabata un artista pornografico transsexual. Autoridad di Aruba no a reacciona ainda riba e caso aki. 

EXTRADICION

Segun e portal Daily Mail Austrailia, polis a confirma cu nan ta den proceso pa extradita e studiante bek pa Australia. Ta conoci cu e proceso aki lo tuma su tempo si. E intencion pues ta pa e polisnan yega Aruba y despues hiba e homber bek pa Australia. Pregunta ta si nan lo logra haci esaki facil. 

E CASO

Informacion di e caso awor ta posibel, 6 siman despues cu e dama a keda asesina. E curpa di e dama Ms McRae a wordo haya den su camber na Coogee, e parti este di Sydney dia 14 di januari ultimo. E dama lo tabata morto pa 4 dia caba ora cu el a wordo descubri. Despues di algun dia, e homber a coy un buelo pa Colombia.  Sinembargo, e homber despues a biaha pa Aruba pa bishita famia. Polis di Australia segun e informe, ta trahando pa coordina e extradicion cu autoridad local. Segun informacion, e Colombiano lo a keda deteni siman pasa diaranson.