FTA: Empresanan mester tuma medida di prevencion contra coronavirus

ORANJESTAD - Recientemente  sindicato di trahadonan FTA ta hayando basta pregunta for di su miembrecia tocante nan derechonan na pia di trabao relaciona cu e amenasa inminente di e virus COVID-19, popularmente conoci como Corona-virus. Actualmente Aruba no tin niun caso registra (ainda) di e virus aki, pero teniendo na cuenta e hecho cu nos ta biba di turismo, ta mas bien un cuestion di tempo cu un of mas di nos bishitantenan cu ta bin for di paisnan cu si ta afecta caba pa e virus aki, lo trese nos den contacto cun’e. 

Esaki segun e sindicato, logicamente ta trese preocupacion bou di nos clase trahador, especialmente esnan cu ta labora den sector horeca, kendenan ta esnan cu mas hopi tin contacto cu nos huespednan cu ta bini for di afo. Con leu dunadornan di trabao den e sector aki (hotel, casino, restaurantnan, etc.) ta obliga di tuma pasonan pa evita y limita e posibel traspaso di e virus na empleadonan?

Segun e sindicato, Articulo 1614x inciso 1 di nos Codigo Civil ta stipula: “E dunador di trabao tin e obligacion di (entre otro) tuma e medidanan necesario pa pa evita cu e trahador ricibi daño como consequecia di eherse su labor.” Inciso 5 di e mesun articulo aki ta amplia e obligacion aki stipulanto cu e dunador di trabao ta responsabel tambe pa otro personanan cu e ta laga haci trabao p’e sin cu e tin un acuerdo laboral directamente cu nan (pensa por ehempel riba contractors of uitzendkrachten). 

A base di lo antes menciona tur dunador di trabao, especialmente esnan den sectornan unda e peliger di exposicion na e virus ta mas halto, tin e obligacion legal di tuma tur medida necesario pa evita cu nan empleadonan ta wordo exponi na Corona-virus. Kico asina nos por compronde bou di esaki?

Esaki kiermeen cu e dunador di trabao entre otro mester inventarisa e risiconan pa cu e virus aki na su empresa y evalua esakinan. Aki por pensa riba preguntanan manera: con grandi e probabilidad ta pa exposicion na e virus, cua trahadornan ta core mas peliger y cual ta e posibel consequencianan. Siguientemente mester pensa riba e medidanan cu tin cu wordo tuma pa evita of minimalisa e risiconan aki.

En general por pensa riba medidanan manera:

- Tene sessionnan informativo cu e empleadonan den cual ta instruinan riba con pa evita y minimalisa posibel contagio cu e virus aki;

- Pone materianan disponibel na pia di trabao, especialmente den areanan di riesgo halto, cu ta mitiga contagio manera ‘hand sanitizers’, habon antibacterial, etc.;

- Duna acceso y oportunidad na empleadonan pa nan laba nan mannan regularmente durante oranan di trabao;

- Limpia y desinfecta areanan publico na e empresa regularmente;

- Ademas ta importante pa duna espacio na empleadonan cu presenta sintomanan, pa no presenta na pia di trabao pendiente exclusion di contagio.

Como representante di empleadonan, FTA ta haya cu ta di sumo importancia pa empresanan tuma medidanan di prevencion di contagio cu e virus aki hopi na serio. Legal y moralmente tur dunador di trabao tin e obligacion pa proteha tanto e trahador como tambe e pueblo di Aruba en general.