Gobierno no a dicidi ainda si ta cancela Aruba Dag debi na coronavirus

ORANJESTAD/ROTTERDAM – Gobierno di Aruba no a dicidi ainda si ta cancela Aruba Dag fin di luna awor si of no. Asina prome minister Evelyn Wever a contesta noticiacla.com dialuna mainta durante e conferencia semanal. Segun Wever, gobierno a cera un seguro si, pa si en caso mester tuma e paso ey, cualkier ‘daño’ cu por resulta di e cancelacion no  afecta nos isla hopi. Pero pa aworaki, ta sigui cu e preparacionan normal, pendiente di e situacion. Si dado caso e fecha yega mas cerca y cos empeora pa loke ta e virus, e ora no ta descarta cu por cancela e evento ainda. Pero cu un seguro, cualkier daño ‘financiero’ p.e., lo ta minimo. E fecha di Aruba Dag e aña aki ta dia 29 di maart 2020.