Buskeda pa companianan pa cultivo y exportacion di cannabis medicinal a inicia

ORANJESTAD – Gobierno a anuncia formalmente dialuna e intencion pa haya companianan interesa pa cuminsa cultivacion y exportacion di cannabis medicinal for di Aruba. Durante un anuncio hunto, ministernan Evelyn Wever Croes y Dangui Oduber a informa cu e ‘buskeda oficial’ (Request for Expression for the development of medicinal cannabis) a keda publica awe. E intencion ta pa haya varios compania (no a specifica cuanto si) cu por ‘competi’ cu otro, y cu lo tin 3 area specifico unda cu gobierno kier pa e cultivacion cuminsa. Oduber no tabata cla pa divulga cua ta e sitionan, ni cuanto compania nan ta buscando pa esaki. 

REKISITO

Den e REOI, tin un lista largo di rekisito cu gobierno a stipula cu e companianan interesa mester cumpli cu ne pa por participa y bira e posibel compania cu por haya e ‘trabou’ di cultiva y exporta e cannabis medicinal. 

PILAR ECONOMICO NOBO

Prome minister Wever a ‘label’ e proyecto aki como un pilar economico nobo cu mester genera entre 15 pa 50 miyon florin di entrada den caha di gobierno. Pa e prome aña aki, esta 2020, gobierno a informa cu nan a presupuesta 15 miyon florin na licensia cu e companianan lo tin cu paga. Pa otro aña esaki lo por aumenta te na 50 miyon florin. Por wak e REOI completo AKI.