Minister y musico a ‘cera paz’ y Le Groove ta toca na Arubadag

ORANJESTAD/ DEN HAAG – E agrupacion Le Groove lo presenta toch na Arubadag e aña aki, no obstante e hecho cu inicialmente su lider Antoni Gario a rechasa e invitacion ‘personal’ pa no ta presente pasobra a invita su so como Soca King y no su banda. For di un comunicado e weekend aki for di Hulanda di Arubahuis, a splica cu mirando cu e decision inicial no a cay na agrado, y cu ‘no a scucha bon kico ta e deseo di nos comunidad’, a opta pa trece cambio den esaki. Mientrastanto na Aruba Gario a topa cu minister plenipotenciario Guilfred Besaril, unda cu e minister ta splica den un post riba su pagina di Facebook, cu nan a ‘pone tur diferencia un banda’, indicando cu a resolve nan diferencianan di pasado unda cu tabatin un 'guera frieu entre nan dos' pa declaracionan cu nan a haci contra otro den pasado. Mientrastanto ya caba e invitacion a sali pa Le Groove completo pa t’ey presente na ArubadagFestival 2020.

BROEDERLIEFDE

Mientrastanto tabatin hopi critica tambe riba e escohencia di e banda Broederliefde, cu e critica principal cu no tin ningun Arubiano of Antiano den e banda, pues nan no por presenta eynan. Aki tambe Besaril durante siman a duna un splicacion pakico a trece Broederliefde como un acto di presentacion. Segun e mandatario, e presentacion no ta costa Aruba nada y como tal e ta beneficia solamente e presentacion. Si esaki a ‘calma’ e protestanan, no ta conoci. Otro invitadonan a confirma nan presentacion manera e rey di Tumba. E evento mes ta dia 29 di maart proximo den Ahoy na Rotterdam. Potret ta for di pagina di Facebook di minister Besaril.