Carta ta revela condicion di Hulanda na Aruba riba 'deal' diploma HAVO/VWO

ORANJESTAD – E protocol di enseñansa di 2012 entre Hulanda y Aruba lo keda adapta te ora cu minister di enseñansa di Aruba Michelle Hooyboer a informa minister di enseñansa di Hulanda cu e pasonan necesario a wordo tuma. No prome. Entre e condicionnan plantea, Hulanda ta bay di acuerdo solamente si Aruba por logra haci e cambionan menciona pa medio di e cambio di leynan necesario, prome cu 1 di januari 2016. Asina e director general di Hoger Onderwijs, Beroepsonderwijs, Wetenschap & Emancipatie, Hans Schutte ta manda bisa minister Hooyboer den un carta fecha 4 di december 2014, cu NoticiaCla.com a haya den su poder recientemente. Schutte ta mande na nomber di minister di OCW (Onderwijs, Cultuur en Wetenschap).

E ta e ‘carta’ cu minister di Enseñansa no por a duna prensa ainda, ora cu e la participa e cambio recientemente den un conferencia di prensa, y sigura tur hende cu no tin problema mas cu e asunto di diploma di HAVO y VWO. Mes momento Schutte ta bisa cu e ta ‘aprecia’ e hecho cu Colegio Arubano tuma paso pa motiva su alumnonan pa tuma examen final den mas vak. “Mi ta aprecia esey, y mi ta asumi cu bo lo haci esey tambe y stimula esaki” Schutte ta sigui manda bisa e mandatario di enseñansa di Aruba, elogiando e maneho asina di Colegio Arubano.

 Durante e conferencia di prensa na Aruba, minister di enseñansa a splica cu e tin cu analisa cu su hendenan si no tin problema pa publica e carta, mirando su contenido. For di e dia ey, prensa no a ricibi e carta aki mas, te awor cu e la bin den poder di NoticiaCla.com. Den e carta, Schutte ta repasa e corespondencia cu e mandatario di Aruba, punto pa punto. Entre nan, cu Aruba lo introduci e asina yama ‘aangepaste slaag / zakregeling’ pa Havo lo drenta na vigor entrante 1 augustus 2015, y pa VWO un aña despues. Aruba ta compromete cu na 2017/18, lo tin suficiente materia pa e examennan respectivo, cu ta 7 pa HAVO y 8 pa VWO. Hulanda ta ‘constata’ tambe den e carta cu Aruba kier implementa e cambionan cu Hulanda a propone, un aña mas laat, y ta splica di e consecuencia di esey. No obstante e consecuencia, Schutte tin comprension pa e cambio aki. Pues, Hulanda ta mustra cu nan ta bay di acuerdo cu e plan cu Aruba a presenta, den un pakete di por lo menos 13 pagina, detaya, cu nan ta bay di acuerdo, contal cu e condicionnan ariba menciona, wordo cumpli cune. Lesa e carta di Schutte aki)