Diasabra ta Dia di ‘Malesa no comun’ esta Rare Disease Day

ORANJESTAD - ‘Rare disease’ ta afecta solamente algun hende rond di mundo maske cu den total e cantidad di persona cu tin ‘malesa no comun’ ta ekivalente na e populacion di e di tres pais mas grandi na mundo. Rond di mundo tin 300 miyon di hende cu ta biba cu un ‘rare disease’ cual ta 5% di e populacion di mundo. Tin mas di 6000 diferente ‘rare disease’ identifica, 72% ta genetico di cual 70% ta cuminsa durante infancia  

‘BFF Best Friends Foundation’ ta yama danki na tur hende, compania y organisacion cu semper a sostene e causa di Ethan Geerman su condicion cu ta Epidermolysis Bullosa. Ethan ta e unico persona na Aruba cu ta biba cu e condicion aki y a ricibi hopi apoyo durante e ultimo añanan for di comunidad di Aruba. 

‘BFF Best Friends Foundation’ ta pidi pa corda riba tur mucha cu tin ‘rare disease’ na Aruba manera Wolf-Hirschhorn Syndrome y Trisomy 18 Syndrome. Pronto lo organisa actividad pa recauda fondo pa asina sostene diferente mucha cu tin ‘rare disease’ y condicion medico complica na Aruba. 

Ta stimula Aruba completo pa post e potret di Ethan y pa saca un potret den grupo pa asina apoya e causa. Por comparti e potret di Ethan y saca potret den grupo riba social media pa asina participa como un ‘Rare Disease Ambassador’ na Aruba. Corda uza e siguiente hashtagnan ora di post: #rarediseaseday #caresforethan #showyourrare #Aruba. Facebook y Instagram: Cares for Ethan