Fuente: Ausencia di Mike Eman na Hulanda no ta nifica boycot

MIAMI/ORANJESTAD/DEN HAAG – ‘E no ta un boycot’. Esaki ta comentario di fuentenan yega na prome minister, cu a sigura NoticiaCla.com diabierna cu e hecho cu prome minister Eman no ta presente na Hulanda, no ta pasobra kier boycotia Hulanda. “Ta simplemente cu e circumstancianan actual, ta rekeri nos pa ‘re-focus’ y ahusta prioridadnan” e fuente a bisa NoticiaCla.com. E prome mandatario ta na Merca actualmente.

Manera ta conoci, prensa hulandes a raporta e siman aki e premiernan di Aruba, Corsou y St Maarten lo boycotia e ‘Dia di Reino’. Esaki e revista Elsevier a raporta for di Den Haag. E aña aki ta netamente 60 aniversario di nos statuut, pero tur tres isla (segun Elsevier) a manda un representante. Corsou ta manda vice prome minister Etienne van der Horst. No ta conoci ken ta wordo manda na nomber di premier Eman y premier di St Maarten Sarah Wescott Williams. Na Hulanda tin e pensamento, cu e boycot tin di haber cu e actuacion di gabinete Rutte na St Maarten y Aruba. E foto ta di e facebook site di prome minister Eman durante e bishita di dje e siman aki na Miami, relaciona cu un congreso di ex presidente mericano Bill Clinton.