Aeropuerto cu demanda criminal contra pasahero di menasa di bom

ORANJESTAD – Aeropuerto di Aruba su gerencia a entrega un demanda criminal y civil contra un pasahero cu a haci un menasa di bom na comienso di e luna aki. Esaki ta nifica cu e pasahero aki tin cu presenta aki dos luna den corte na Aruba pa responsabilisa su mes pa su actonan. Asina Aruba Airport Authority a informa diahuebs. Nan a dicidi di tuma e paso aki mirando e impacto dramatico cu e ultimo menasa tabatin riba e operacion di aeropeurto. “Cu e decision aki AAA kier sigura cu e tipo di menasa cu consecuencia serio pa hopi partido, lo no bay sin castigo y lo tin consecuencia serio pa e sospechoso”. 

ULTIMO BOMMELDING

E ultimo caso di bommelding tabata dia 8 di februari ultimo. Riba e fecha ey, parti di e aeropuerto a keda evacua, un sospechoso a keda deteni y e maleta a keda confisca. Despues cu e maleta a keda libera, aeropuerto a continua cu su operacion. Ta despues AAA a bin compronde cu e menasa di bom tabata un ‘chiste’ di un pasahero. “AAA ta tuma tur menasa di bom serio y ta atende esaki conforme  protocol standar y procedura den casonan asina” e informacion ta bisa. 

DESTRUMPI OPERACION

Tambe nan ta mustra cu como cu e incidente ultimo a causa desrumpcion serio di e operacion di aeropeurto, AAA a anunci cu nan a demanda e sospechoso criminalmente y civilmente. Despues di apenas 4 dia deteni, e sospechoso tabata den libertad y a biaha bek pa merca. Pero el a haya un orden di presenta den corte na Aruba dia 30 di april 2020 durante cual e persona aki mester responsabilisa su mes pa su actonan. 

EFECTO

Ora cu tin un caso di bommelding, e ta afecta cantidad di usuario di aeropuerto, incluyendo pasahero, aeroliña, groundhandlers, concesionnan y mas. Tur ta sufri daño operacional y financiero pa motibo di e incidente aki. Como tal aeropuerto a tuma e decision pa awor y den futuro, tuma e paso aki.