AHATA y Ministerio di Turismo a lansa campaña ‘Ami ta Turismo’

ORANJESTAD – Cu e fin pa genera interes den labor den sector hotelero y yuda yena e cuponan den e sector aki, Aruba Hotel & Tourism Association (AHATA) conhuntamente cu ministerio di turismo a lansa e programa di concientisacion diahuebs, ‘Ami ta Turismo’. Segun CEO di AHATA Tisa LaSorte, motivacion pa e campaña tabata e falta di trahado cu e sector aki ta confrontando. Gobierno lo sostene e programa pa medio di conseho mientras cu AHATA lo financia e campaña completamente. 

CAMPAÑA 

Durante un periodo di 6 siman, lo presenta un total di 15 video di personanan cu ta labora den e sector hotelero, unda cu nan ta comparti nan experencia, den un intento pa motiva otronan pa sigui nan paso tambe. E intencion ta pa medio di e videonan aki, e motiva y educa e ciudadano cu mester di trabou, pa haya interes pa labora den e sector hotelero, y hunto cu esey, elimina cualkier duda cu por tin riba e tereno hotelero. 

DUDA

Entre dudanan cu tin ta cu e salario ta malo, e horarionan ta dificil y e tipo di trabou no ta adecuado. Tur esaki ta wordo splica den e videonan pa medio di experiencia di esnan cu ta duna nan testimonio. Nan ta mustra e aspecto interesante di con por labora y mas ainda, progresa den e mundo hotelero. Segun LaSorte, ta spera cu e videonan aki por inspira e hende local di drenta e mundo hotelero, y crea un carera ideal pa nan.