Rey di Soca 2020 a rechasa invitacion pa ta na Arubadag

SAN NICOLAS – E Rey di Soca 2020, Antoni Gario, miho conoci como Black Diamond, a rechasa su invitacion pa presenta na Arubadag 2020 na Rotterdam otro luna. E ta confirma e noticia di noticiacla.com di ta ‘parti di e line up’ y cu el a ricibi su invitacion un dia prome. Pero, mirando cu e no a ricibi invitacion pa su banda completo “Le Groove”, el a rechasa esaki mesora tambe. E invitacion pa e otro ganadornan tambe ta ‘a titre personal’, pues no cu banda. No ta conoci si e otronan tambe lo rechasa nan invitacion. 

REACCION

Segun Gario, “e 'Rubiano ta tolera hopi, dobla casi semper y ta bon hende te dimas pero e 'Rubiano tin cu sinja para pa su palabra y para den su sapato ora e bisa algo.!!” e ta cuminsa bisa riba su pagina. “ Berdad ayera mi a ricibi un invitacion pa bay Hulanda mi so.!! Como Rey di Soca 2020 y cu un acohida aplastante, lo mi kier deleitá mi pueblo aya na Hulanda cu mil amor. Sinembargo, mi a train, mi a toca y mi a gana cu LG-P4L.!! Dus si no tin posibilidad pa mi banda acompanjami, lo mi tin cu rechasá e invitashon. Cual mi a hasi di inmediato pa no perde Gobierno so tempo” Gario ta sigui bisa. “Tanten cu e 'Rubiano keda aportá na programanan di Arubadag cu e Arubano nokier, Gobierno lo sigui pone programanan den otro cu ta benificiá nan den tur sentido di palabra. Ami, Rey di Soca 2020 ta lamenta e realidad tristo y contra boluntad di Pueblo di Aruba aki. Cu hopi tristesa den mi curason, pero cu honor na mi palabra como Rey, mi lo no t'ey Aruba.!!” e ta finalisa bisando.