DVG: No ta cuestion di si coronavirus ta yega Aruba, sino ki ora

ORANJESTAD – No ta cuestion cu si e coronavirus ta yega Aruba sino ki ora. Asina e representante di departamento di salud Jurrete Croes a informa den un conferencia di prensa diaranson riba e tema menciona. Algun siman ainda e hefe di e departamento di malesa contagioso, a bisa tambe cu no por para e virus di drenta nos isla, sino cu nos mester ta prepara p’e. Segun e expertonan diaranson, Aruba no tin caso ainda y ta prepara pa cualkier eventualidad. 

PANICO

Loke ta haci cu mester duna conferencia riba e tema segun e epidimiologo Wilmer Salazar, ta cu tin un panico danki na rednan social, creando e impression cu esaki ta un atake bioterorismo, siendo cu esey no ta e caso. E ta un virus poco conoci, y esey ta haci cu hende por crea un ‘chaos innecesario’. E intencion ta pa crea trankilidad, cu informacion corecto, y mustra cu e panico pa cu e virus aki,  no ta necesario. A mustra cu influenza ‘regular’ a mata mas hende cu e virus actual. Esey no ta kita afo cu nos no mester ta prepara pa ora e yega. 

CONFERENCIA

Segun hefe di departamento di malesa contagioso Sharline Koolman, ta necesario pa tene conferencianan di prensa riba e tema, pa asina por tene tur hende informa y por contesta pregunta cu ta bin constantemente.