Koolman: Aruba no por nenga bapor crucero sin mas di drenta

ORANJESTAD – Aruba no por nenga un bapor crucero di mara na nos haf of, pio ainda, un avion di baha na Aruba sin mas. Segun hefe di departamento di malesa contagioso di Departamento di Salud Sharline Koolman, mester tin un motibo hopi extremo pa Aruba cera frontera pa un bapor of avion asina. E hecho cu otro islanan den Caribe si a opta e siman aki ainda (lesa e articulo riba noticiacla di Jamaica) pa nenga bapornan crucero di mara na nan haf, tin consecuencia internacional pa nan, segun Koolman. 

NO POR NENGA

Segun Koolman, tratadonan internacional ta prohibi pa nenga ‘trade and travel’, esta comercio y biahe of interumpi esaki. Mester tin motibonan valido pa por tuma e paso aki. Ora cu nenga un bapor pa mara na un isla, ta nengando un cantidad grandi di pasahero, y ta pone cu nan ta keda riba laman sin por yega un caminda. Algo asina internacionalmente tin sancionan. 

OCEANDREAM 

A referi e.o. na e caso di e bapor crucero Ocean Dream cu tabatin un virus abordo pero cu si a baha na Aruba mientras cu otro islanan a nenga esaki di yega na nan waf. Den caso di un situacion asina, ta DVG ta conseha e respectivo minister encarga kico pa haci, pa despues e mandatario tuma e decision final di sea permiti of nenga un bapor crucero of avion den e caso aki di yega un isla pa motibo di malesa.