Oduber: Aumento di gasto medico na Aruba no ta excesivo

ORANJESTAD – Gastonan di cuido medico na Aruba a subi cu 68.4 miyon den tres aña di tempo. Mes momento ta sigura segun un comunicado di ministerio di salud.  Esaki ta un di e prome notanan di e ‘doorlichting’ cu a haci na AZV. Esaki ta e prome biaha den historia gobierno y AZV, segun e comunicado di Gobierno, cu a laga haci un investigacion profundo riba e gastonan di AZV y tambe pa duna un proyeccion pa futuro y kico ta e risico cu esaki ta bin cune.

RESULTADONAN

Director di AZV Sr. Ruben Goedhoop a presenta e resultadonan di e investigacion aki na Minister Dangui Oduber. Tabata tin varios punto cu sigur a hala atencion. Por a nota cu gastonan di cuido medico a subi di 357,3 miyon florin na 2014 pa 425,7 miyon na 2018. Si  compara y “benchmark” e aumento aki cu  otro paisnan rond di mundo, por bisa cu esaki no ta un aumento excesivo compara cu otro paisnan, segun e comunicado. E gastonan medico di otro paisnan ta aumenta na e mesun forma. Na aña 2016 gasto di cuido medico a costa 3576 dollar pa persona cu ta biba na Aruba. Gastonan den cuido medico cu ta relativamente halto ta entre otro Diabetes, Nierdialyse y otro malesanan cronico. 

REDUCI GASTO

Otro forma di tuma medida pa reduci gasto ta pa e AZV, Hospital y ImSan traha hunto pa hisa calidad di cuido mientras ta baha e gastonan. Un ehempel ta si por utilisa un localidad so pa Dialyse y otro facilidad pa un otro servicio medico, asina balansando e trabou y gastonan enbes di competi cu otro.

DIGITALISACION

Digitalisacion y innovacion den cuido tambe ta e futuro pa cuido medico. Ideal ta si por haci triage via un app of facetime cu bo dokter di cas y a base di esey elo por consehabo si ta necesario pa acudi personal serca di dje of continua cu “Self Care” na cas.

CONTRIBUCION

Un otro punto remarcabel ta cu 4% di e aseguradonan di AZV ta contribui na 40% di gastonan di AZV. E edad promedio di e aseguradonan di AZV na aña 2014 tabata 38.7 y ta proyecto cu esaki lo bira 40.5 den 2020 y cu proyeccion pa aumento continuo den futuro. Esaki gran parti tin di haber cu e “vergrijzing” cu Aruba ta aden actualmente cu tambe lo conoce un aumento continuo.

PLAN VAN AANPAK

Abase di e resultadonan di e investigacion haci na AZV, lo bai over na haci un “plan van aanpak” pa asina garantisa sostenibilidad di e fondonan di AZV pa futuro.