OM: Captura di droga riba barco 'Aressa' ta esun di mas grandi pa Aruba

ORANJESTAD – Segun vocero di ministerio publico di Aruba Ann Angela, ta confirma cu e barco di carga intercepta dialuna pa Warda Costa, ta e captura mas grandi di droga den historia di Aruba. Sinembargo no por a divulga e cantidad exacto di cocaina intercepta si. Ademas e ta confirma cu un total di 11 persona a keda deteni. No kier a divulga e nacionalidadnan mirando cu esey ta ‘parti di e investigacion’. Ademas a confirma cu e barco ta confisca tambe pa ministerio publico. “ E investigacion abordo ta andando ainda. E ta den man di kustwacht, KPA y defensa di Reino Hulandes” Angela a finalisa bisando.

E SUSESO

Manera ta conoci, dialuna Warda Costa a intercepta e barco aki, y a ordena e capitan pa trece e barco waf di Oranjesta. E barco tabata riba ruta di waf di Guaranao Venezuela, cu destinacion final   Thessaloniki, Grecia. E barco a keda intercepta den awa territorial internacional unda cu a detene e 11 personanan. E barco tabata nabega cu bandera di Cameroon (Africa) desde 2019 y prome cu esey, bou di banera Ruso te 2017.  Potret cortesia Notizias Curacao.