Corte: Aunke Sevinger a actua ilegal,e no mester rectifica

ORANJESTAD – Mientras cu parlamentario Benny Sevinger a actua ilegalmente door di yama colega parlamentario Rocco Tjon pa pedofiel, e no mester rectifica esaki manera cu Tjon a exigi den su demanda contra Sevinger. Asina corte a dicta den un sentencia di e caso cu Tjon a inicia contra Sevinger. Tjon a demanda huez pa Sevinger rectifica den algun medio di comunicacion, y tambe prohibi Sevinger pa sigui haci mencion di e topico. Den e demanda, ta pidi tambe pa Sevinger rectifica cu Tjon a gaña pa por bira director di KIA. Juez a rechasa e dos ponencianan aki. 

CULPABEL

Segun huez, Sevinger como parlamentario, mester por spera e precaucion necesario ora cu ta trata comentario riba un colega Parlamentario riba tema hopi sensitivo. Sigur awor cu Sevinger mes a decalra cu e no conoce e contenido di e caso penal contra Tjon riba e tema. “E conclusion ta cu Sevinger cu e declaracion (di yama Tjon pa pedofiel), a comete un acto ilegal contra Tjon” huez a dicta den su sentencia. (Den 2010 a acusa Tjon di pedofiel, pero ministerio publico a seponeer e caso e tempo ey:Red). 

NO MESTER RECTIFICA

Mientras cu ta haya Sevinger culpable di a yama Tjon pa pedofiel, Sevinger no ta obliga pa rectifica manera cu Tjon a exigi den e caso. Esaki pasobra no a mustra cu e medionan en cuestion lo a publica e declaracionan di Sevinger, manera cu Tjon ta alega. Pa loke ta e declaracion di Sevinger cu por a perhudica e nombracion di Tjon como director di KIA, Huez ta mustra cu e declaracionan aki tabata falso y como tal Sevinger a gaña. Sinembargo, como politico y persona publico, e declaracionan haci no por wordo trata como ‘ilegal’. Como tal e demanda di Tjon riba e parti aki, tambe huez ta rechasa. De hecho, huez ta rechasa e demandanan principal di Tjon. 

INTERPRETACION

Mientras cu Tjon no a logra su meta principal den e caso, ta mustra cu huez a indica si cu Sevinger a comete fayo y cu riba esaki, Tjon por presenta esaki den comunidad pa medio di un conferencia di prensa y esey mester ta suficiente. Sin embargo ta un hecho cu tur e demandanan a wordo rechasa. Consecuentemente, manera a spera, Tjon a presenta e caso como uno gana p’e, mirando e cierto alegacionan cu huez a haci den direccion di Sevinger. Lesa e sentencia completo AKI.