ORANJESTAD - ATA a reconoce 3 empleadonan cu a sobresali den 2019. E ekipo di Aruba Tourism Authority ta consisti di un grupo grandi di profesionalnan, cu hunto ta traha duro pa asina por cumpli cu e compromiso cu cada un di nan tin cu nos dushi isla. Pa e prestacion di cada empleado por ta uno optimal, e ambiente di trabou mester ta uno hopi ameno y saludabel pa traha aden, mirando e tempo y dedicacion cu e trabou ta rekeri.
Pa yuda mantene y fortalece e union y e ambiente di famia entre empleadonan, A.T.A. ta organisa anualmente un dia di Team Building. E evento sigur tabata un dia special pa e ekipo dinamico aki, cual a yuda fortifica e sentido di traha den ekipo. Durante e dia ameno aki, coleganan di A.T.A. a participa den diferente weganan deportivo riba nos bunita playa di Rodgers Beach.
Aruba Tourism Authority sigur ta aprecia y alabes ta reconoce e esfuerso y determinacion cu cada empleado tin pa cu nan trabou. Den cuadro cu esaki, durante 2019 A.T.A. a inicia cu un programa cu ta hiba e nomber di Hi-Fives. E programa ta uno interno di A.T.A. cual ta permiti tur empleado pa duna reconocimento y merito na nan coleganan pa diferente accionnan cumpli. E programa di Hi-Fives ta mara na e balornan cu A.T.A. ta haya importante.
Durante atardi, a saca e ganadonan pa loke ta trata e programa di reconocimiento. Despues cu a registra un total di 212 Hi-Fives den 2019, e ganador absoluto a resulta di ta Raul Piar, kende a haya mas hopi feedback positivo, compliment y reconocimento for di su coleganan di Aruba Tourism Authority.
Jerusha Rasmijn ta e di dos persona cu a ricibi hopi feedback positivo durante ultimo aña for di coleganan y tambe a ricibi su merecido reconocimento. Ademas Jerusha Rasmijn a cumpli 30 aña de servicio na Aruba Tourism Authority recientemente. Algo cu A.T.A. lo conmemora na su debido momento durante e aña aki.
E di 3 persona cu a ricibi reconocimento tabata Diantha Boekhouwer kende tambe a ricibi hopi reconocimento di coleganan pa tur su esfuerso y dedicacion cu el a exhibi durante ultimo aña.
Di e forma aki, Aruba Tourism Authority ta yuda na percura cu cada empleado por sinti nan mes honra, y na final presta e miho di nan y alabes ta yuda na engrandece e lace di famia entre empleadonan di A.T.A., cual na final di dia lo refleha den un manera positivo den e trabou, tarea grandi, y compromiso cu Aruba Tourism Authority tin cu nos dushi isla di Aruba. Un pabien y danki di curason na specialmente e tres empleadonan cu a sobresali den 2019!
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.