Romano: Pa DIMP ta hopi fastioso cu a hala fecha di pago di number di auto

ORANJESTAD – Departamento di impuesto (DIMP) a confirma diaranson mainta na prensa cu pa nan tabata hopi fastioso cu gobierno (lesa: minister di Finanza Xiomara Maduro) a hala e fecha di pago di number di auto. Ta trata di e hecho cu e minister a dicidi pa cambia e fecha di 31 di januari 2020, pa 28 di februari 2020. Asina lo a duna mas hende chens pa paga, mirando cu e numbernan di auto no a yega na comienso di aña. Pero segun vocero di DIMP Meverly Romano, e cambio aki no a resulta toch den un miho cumplimento por lo general y no a haci un diferencia. Ta un grupo chikito a haci uso di esaki.  

SISTEMA AUTOMATISA

A splica cu ora cu un minister dicidi di cambia e fecha, mester cambia e sistema interno pa por registra esaki corectamente. “Nos sistema automatisa ta configura pa 31 di januari. Nos sa caba cu manera cu 31 di januari pasa, nos por cuminsa procesa e cobransanan adicional” Romano a bisa. Ora cu hala e fecha, segun Romano, e no ta drecha e comportacion di pago, pasobra tin apenas 53% cu a cumpli mientras cu falta 45% pa cumpli. 

FASTIOSO

Segun Romano, cambio ta poco fastioso pa DIMP, pasobra dia 31 di januari nan si tin cu keda papia di dje, pasobra ta e fecha mara den ley. “Nos no por yega cambi’e. Nos no por bisa, ‘ah no nos ta tene cuenta cu fin di aña, tabata Pasco y Aña Nobo, awor ta Carnaval, y nos ta bisa nos ta hal’e. Nos no por bisa esey” Romano a splica mas aleu.