DIMP: Na comienso di luna di maart lo parti plachi di number

ORANJESTAD – Si ta bon, e barco cu tin cu trece e cargamendo di plachi di number pa Aruba a yega Panama y ta yegando Aruba den curso di e siman aki. Asina e vocero di departamento di impuesto Meverly Romano a bisa diaranson mainta. E intencion ta pa den e prome dos simannan di maart (2020), DIMP lo por cuminsa parti e plachinan. “Te aworaki tur cos ta canando segun plan” Romano a bisa.  

CONTROL

Mas di 88 mil plachi cu number lo yega, cu tin cu wordo procesa prome cu por parti nan. Segun Romano, ora cu ricibi e plachinan for di douane, tin cu bay controla esakinan un pa un, cu ta dura sigur algun dia di trabou. Mester controla si tur number tey y tambe e parti ‘chikito’. “Mester controla caha pa caha si tur cos tey. Bo por conta cu tin 90 mil plachi cu nos tin cu bay controla, pasobra semper nos ta bestel un cantidad mas halto cu nos tin registra (di e 88.730)”. 

DELIVERY

Ainda DIMP ta planeando pa parti e plachi di number di auto den forma di ‘delivery na cas’, pa medio di un compania priva. “Esey keto bay nos ta papiando cu e companianan di seguro pa esey tambe” Romano a bisa. E companianan ta dispuesto pa coopera cu esaki. E compania mes cu tin cu keda encarga, no ta conoci ainda ni e suma cu e cliente di DIMP tin cu bay paga pa e servicio extra ey. E cliente no ta obliga pa haya e servicio ey, y DIMP no por obliga e persona pa paga extra. Pero e realidad ta keda cu si e persona kier pa e plachi keda entrega te na cas, e tin cu paga extra pa esey si. Si e opta pa no haci esaki, e lo tin cu hacie na e forma ‘tradicional’, esta di bin busca e plachi di number na DIMP mes.