Casi 50% di number di auto no tin nada paga pa 2020 ainda

ORANJESTAD – Tin 45% di number di auto cu no tin nada paga ariba ainda pa 2020, di cual mayoria ta e categoria –A- (34.685). Asina vocero di departamento di impuesto Meverly Romano a bisa durante un conferencia di prensa diaranson. Mes momento a informa cu e plachinan di number ta na caminda pa Aruba y cu prome simanan di maart (2020) lo cuminsa ‘reparti’ esakinan. 

CUMPLIMENTO

Segun Romano, nan ta poco preocupa cu e cantidad ‘grandi’ cu ainda falta pa cumpli cu nan pago. Esaki mirando cu falta apenas un siman pa cumpli cu e fecha final di pago di e prome mitar pa impuesto di number di auto. Y si tene na cuenta cu e cantidad te cu awor ta casi 40 mil number (39.731) di e total di 88.730 number registra, ta pone cu pa dia mester tin 5000 number cu tin cu wordo paga ainda. Y esey tin cu tuma lugar entre DIMP y e facilidadnan auxiliar conoci como MFA. Y aki ta bay tin e problema unda cu tin un cantidad limita (sigur no 5000 hende/number) cu por wordo atendi y of paga. Esey ta si cada persona bin paga un number indidivualmente. 

KEN A CUMPLI 

E cantidad di persona cu si a cumpli, ta riba 50%, esta 53% cu a paga algo. Di e grupo aki 40% a paga full aña   y 13% a paga mitar aña. Segun Romano, na e momento aki a spera cu por lo menos 80% lo a cumpli caba cu e pagamento. 

BOET

Loke esaki ta nifica ta cu un grupo grandi di persona lo haya un multa asina cu e fecha vence di pago cu ta 28 di februari 2020 y cu nan no a paga. Por ehempel si dia 28 di februari yega, y no a paga, dialuna e persona(nan) ey lo haya un multa di 50% di e suma cu nan mester a paga originalmente, plus e suma inicial. Automaticamente e sistema lo añadi e multa si pa 28 di februari 2020 e prome parti no ta paga.