Oduber: Aruba tin su propio plan nacional di prevencion!

ORANJESTAD – Dialuna mainta a tuma lugar e lansamento oficial di e plan nacional multisectoral pa cu prevencion di malesanan no contagioso (non-communicable diseases NCDs) na Marriott Ballroom. Aki Minister di Salud Publico Dangui Oduber a hiba un discurso den presencia di representantenan di di PAHO/WHO Dr. Erica Wheeler y Dr. Taraleen Malcolm. Tambe tabata tin varios miembro di Parlamento, Directie Volksgezondheid Aruba y demas stakeholders presente e mainta aki.

E proceso pa bin cu un plan nacional di prevencion a cuminsa na november di 2018 caminda a presenta un analisis di e situacion y esaki a keda discuti entre tur e stakeholders. Den e analisis aki a conclui cu e causa di morto number un na Aruba ta malesanan no contagioso y e risico pa esaki aumenta ta grandi. Datosnan ta mustra cu e malesanan causante mas grandi di morto prematura na Aruba ta entre otro cancer, problema cardiovascular, diabetes, malesanan respiratorio cronico y mucho mas, tur ta NCD’s

Ora cu datosnan riba estilo di come a keda constata na aña 2017 a base di encuesta di salud cu a keda haci na 2017 a demostra cu na Aruba 52% di e poblacion riba 4 aña di edad ta consumi fruta, 55% ta consumi berdura tur dia y 25% ta consumi e productonan aki 3-5 biaha pa siman. Un encuesta riba actividad fisico fisico a demostra cu na Aruba 54% di adulto ta participa den deporte of otro actividad similar. Tambe a conclui cu ni e adulto ni e hoben no ta alcansa e cantidad di actividad fisico rekeri den 1 siman asina e mandatario a expresa.

Ora cu e mandatario a inicia su trabou como minister na 2017, a keda divulga na dje cu 16.2% di e poblacion di Aruba ta sufri di diabetes y esaki ta mucho mas halto cu e averahe mundial di 8.3%, es decir Aruba ta casi dos biaha mas halto. Den e mesun reunion aki tambe a toca e tema di cuanto esaki ta costando AZV. A keda presenta cu e costo di 1 pashent di dialysis ta costa AZV aproximadamente 100 mil florin pa aña. E tempo ey Aruba tabata tin 200 pashent cu un cresemento di 24 pa 30 pashent pa aña, e 200 pashentnan aki ta costa AZV aproximadamente 20 miyon florin pa aña.