Famia Chines den cuarentena no a presenta simptoma di coronavirus

Famia Chines den cuarentena no a presenta simptoma di coronavirus

Posted on 02/17/2020 9:42 am AST | Updated on 02/17/2020 9:43 am AST

ORANJESTAD – E famia di 4 persona Chines cu tabata den cuarentena pa 14 dia pa motibo di peliger di contagio di coronavirus, ta ‘liber’ atrobe. Asina departamento di salud di Aruba a informa. Manera ta conoci, dia 1 di februari 2020 a regresa Aruba for di China algun residente Chines. Segun informacion ricibi e residentenan aki no a hospeda na ningun region afecta pa Corona Virus COVID-19 na China tampoco a mantene contacto cu ningun hende malo, cu ta e criteria defini pa considera un persona sospechoso. 

Pa ta sigur cu e famia aki no tin e virus y ta encontra nan mes den periodo di incubacion unda sintomanan lo aparese despues, seccion di malesa infeccioso a pidi colaboracion di e famia pa keda den cuarentena pa 14 dia. E famia a compronde esaki y a colabora cu e proseso. Durante e 14 dianan cu a pasa e seccion responsabel a controla e famia tur dia riba sintomanan di griep relaciona cu corona virus COVID-19. 

Diadomingo despues di 14 dia Departamento di Salud Publico por informa cu e famia encuestion ningun dia a presenta ningun sintoma sospechoso y desde diasabra 15 di februari ta liber di cuarentena.

  • Zulo
  • Powered by SETAR