Mientras CFT ta na caminda, ta buscando otro solucion

ORANJESTAD – Tin dos proceso ta canando paralelo, cu e fin pa resolve e impasse cu tin entre gobierno di Hulanda (sostene pa Gobierno di Reino) y gobierno di Aruba. Combersacionnan entre representante di gobierno y gobernador ta avansando, segun premier Eman a confirma laat dialuna atardi, pero no kier a cana dilanti. “Cu e experiencia cu mi tin di e ultimo dianan, mi ta prefera bisa algo ora cu tin algo concreto” Eman a declara na television local. E deal aki lo mester trece un fin na un impasse, y segun Eman, esaki por ta den e proximo ‘horanan’.

Mes momento, e proceso ‘normal’ cu a cuminsa for di momento cu e aanwijzing a wordo duna na Aruba diabierna, ta canando su curso. Esaki no a cambia. Cu e firmamento di e KB dialuna mainta, y ricibi pa gobernador dialuna atardi, e secretariado di College Financieel Toezicht ta yega Aruba diamars pa cuminsa cu nan reunionnan. Nan tin cita cu tanto gobernador como e organonan arubano cu lo tin cu suministra informacion pa e investigacion por cuminsa cana.

No ta conoci con e dos procesonan por cruza otro y finalmente desemboca den un solo proceso cu e fin di termina e impasse formal cu tin aworaki. Oficina di gobernador tin un silencio hermetico y no kier ni confirma e reunionnan cu a tuma lugar dialuna atardi entre e representantenan di gobierno di Aruba y gobernador.

Na Hulanda mientrastanto ta anticipa (segun vocero di e mandatario hulandes a sigura NoticiaCla) cu diamars Minister Ronald Plasterk lo contesta preguntanan haci pa miembronan di Tweede Kamer. Aki lo por haya un claridad di e pensamento di gobierno hulandes. Entre nan, e interpretacion di nan si nan a comete un fayo constitucional of no, si nan ta acepta esey y si tin otro salida fuera di e KB cu a wordo otorga na Aruba.

Na Aruba, Eman ta sigui ricibi bishita di varios politico di region. Politiconan manera Ramoncito Booi, Rafael Santana, Elvis Tjin-A-Sjoe, y tambe ex premier di Antiyas Emily de Jongh Elhage, mientras cu NoticiaCla a compronde cu ta na caminda tambe for di St Maarten, prome minister Sarah Wescott Williams. No ta conoci ki impacto e bishitanan aki lo tin y si e ta cambia e pensamento di Hulanda pa cu e situacion.

E salud di Eman ta keda fragil, pero stabil. E dos parlamentarionan tambe ta den un situacion delicado pero stabil. Un persona cu no a wanta, mester a wordo hospitalisa den curso di dia, y asina e control ta sigui riba esnan cu tambe ta den e welga di hamber cu premier Eman.