Maduro: CAFT ta positivo riba e resultado financiero di pais Aruba

ORANJESTAD – “CAFT ta positivo riba e resultado financiero di Pais Aruba”. Asina e comunicado di gobierno di Aruba riba e reunion cu e colegio di supervision financiero CAFt ta bisa. Ta specifica esaki asina, pasobra e colegio mes a manda su propio comunicado riba nan interpretacion di e bishita. Y den e comunicado ey, ta un frase so ta positivo di e comunicado. Ta custumber si cu cada partido ta duna su interpretacion di e bishita di e colegio di supervision. 

E COMUNICADO

Segun e comunicado di gobierno durante e reunion a trata diferente tema, entre nan, resultado di presupuesto 2019, presupuesto 2020, cuentanan anual, pasonan tuma pa atende cu gasto di personal y debe. E mandatario a enfatisa den e comunicado, cu tabata un bon reunion y ta mustra cu CAFT ta satisfecho cu e trabou cu Gabinete Wever-Croes a bin ta haci riba e tereno financiero. Loke nan no ta bisa, ta cu (conforme e comunicado di CAFt), ta cu Presupuesto 2020 di pais Aruba no ta suficientemente hustifica ainda y asina tin un cantidad di otro cos cu nan ta remarca den nan comunicado y nan conferencia di prensa. Nan no ta completamente negativo, pero ta mustra gobierno si riba varios cos cu ainda no ta bayendo bon y cu mester di atencion.