Aunke Aruba no a cumpli cu palabracion, CAFt no ta papia di ‘aanwijzing’

Aunke Aruba no a cumpli cu palabracion, CAFt no ta papia di ‘aanwijzing’

Posted on 02/14/2020 6:13 pm AST | Updated on 02/14/2020 6:13 pm AST

ORANJESTAD – Aunke cu gobierno di Aruba ainda no tin un presupuesto aproba pa 2020, e colegio di supervision di Aruba CAFt no ta papia di conseha RMR (Rijksministerraad) pa duna Aruba e aanwijzing (instruccion) cu tin riba mesa desde aña pasa november. RMR tin e aanwijzing ‘wanta’ pendiente e aprobacion di e presupuesto aki. Si e contenido no ta cuadra cu palabracion haci, RMR a informa Aruba caba (via minister Raymond Knops) di lo otorga Aruba e aanwijzing. Mientras cu e presidente di CAFt Gradus no ta mustra di tin ‘pura’ cu e aanwijzing, el a duna indicacion si cu e mester ta cla pa 1 di april proximo pa gobernador firma. Riba insistencia di prensa pakico si tin regla, ta sigui duna Aruba tanto ‘chens’, Gradus a bisa cu nan ta warda e producto final y djey lo dicidi. 

CONSEHO

Tabata aña pasa na November cu prome minister Evelyn Wever a biaha pa Hulanda pa asina purba evita cu Hulanda lo a duna Aruba un aanwijzing, basa riba e situacion financiero di Aruba despues cu CAFt a duna e conseho pa e aanwijzing. Wever a logra convence Hulanda pa duna mas tempo. A palabra e ora ey cu lo duna Aruba te januari 2020 pa trata y aproba e presupuesto. Ora cu januari a pasa, e portal aki a puntra Wever kico ta pasa awor, y e la sigura e portal aki cu Hulanda a duna Aruba te februari 2020 pa keda cla. E siman cu a pasa, e portal aki a puntra minister di finanza Maduro, kico a pasa cu ainda e presupuesto no a keda trata mientras cu nos ta na final di februari 2020. A bisa cu lo trate na maart mas sigur. No ta conoci pa e portal aki, si Hulanda lo a aproba e extencion di nobo. E portal no a haya reaccion di Hulanda ainda riba e parti aki. 

  • Powered by SETAR