SAC a perde caso den corte contra gobierno di Aruba

ORANJESTAD - Stichting Arubaanse Carnaval a perde e caso di LAR cu e la entama contra gobierno di Aruba. Diahuebs mainta hues a dicta e sentencia, cu ta pone cu SMAC lo ta esun cu lo organisa e carnaval 2015. Mes momento NoticiaCla.com a haya confirma cu e siman aki SMAC a haya su permiso di gobierno pa organisa tur su actividadnan carnavalesco pa 2015. Abogado pa SAC, Jonathan Steward a splica NoticiaCla.com cu esaki ta e fin, den sentido cu lo no apela e sentencia pasobra ta trata di un caso LAR cu no por apela. Ademas, pa cuminsa algo otro awor, mester di argumentonan mas fuerte, cu no tin, fueras di loke nan a usa. Steward a sigui bisa cu e argumento cu huez a usa, ta cu no ta bay 'toets' maneho di un minister, pasobra esey ta e maneho di minister. Ademas e embergadura economico lo ta asina grandi si e veredicto ta otro, y lo afecta interes general den un forma negativo. Como tal a rechasa e peticion. Di otro banda, huez a duna SAC rason riba e parti di openbare orde, den sentido cu gobierno no por a demonstra cu SAC a viola esaki. Loke ta sigui ta un tratamento di comision di LAR dia 16 di december unda cu lo discuti e 'bezwaar' di SAC. Sinembargo, e conseho cu lo sali, ta un conseho y gobierno na final tin e desicion den su man. Y gobierno no ta bay desvia di e sentencia di awe. Como tal por considera e caso aki como sera, segun e abogado. Presidente  di SAC Tecla Kelly no tabata disponibel pa comentario despues di e sentencia. Esun cu tambe a reacciona tabata e mandatario di Cultura Otmar Oduber. "Hues a tuma e argumento di algemeen belang, y cu e evento ta importante pa economia di Aruba, y cu no tin sosten pa Sac di parti di e gruponan di carnaval"  Oduber a confirma na NoticiaCla.com diahuebs mainta den su prome comentario. Mas comentario na caminda.