CAft:  Presupuesto 2020 di pais Auba no ta hustifica suficiente

CAft: Presupuesto 2020 di pais Auba no ta hustifica suficiente

Posted on 02/14/2020 3:47 pm AST | Updated on 02/14/2020 3:50 pm AST

ORANJESTAD – Presupuesto 2020 di pais Aruba no ta suficientemente hustifica ainda. Asina e colegio di supervision financiero CAFt ta bisa den un comunicado diabierna. E colegio a finalisa su bishita di dos dia na Aruba y despues a tene su conferencia di prensa. Tambe riba pregunta di e noticiacla, e colegio a admiti cu nan ta en espera di e presupuesto 2020 su version final pa wak si e instruccion riba mesa, mester wordo usa si of no. “Esey bo tin rason”, presidente di e colegio Raymond Gradus a bisa e portal aki. E presupuesto proyecta di Aruba pa aña 2020 ta cera cu un surplus di 0,6% di e Producto Interno Bruto (PID/GDP), esta e balor monetario di tur e bienes y servicio produci den pais durante un aña. Esaki ta cumpli cu e norma pa un surplus presupuestario for di e protocol acorda cu Hulanda. 

DEBE NOMINAL 

Pa prome biaha den hopi aña e debe nominal y e gastonan di personal, incluyendo e fondonan presupuestario lo baha. Ta importante pa Aruba respalda e palabracionnan pa baha e gastonan di personal como tambe garantisa esaki pa e añanan binidero. Tambe pa loke ta trata e ingresonan, mester mehora e hustificacion di e ingresonan  incidental calcula. CAft a pidi mas atencion pa busca y probecha di e oportunidadnan pa reduci e gastonan publico na luga di aumenta impuesto pa logra finansas publico duradero y sostenibel. 

PRESUPUESTO PROYECTA PA AÑA 2020 

Pa mayoria di e medidanan structural den e presupuesto proyecta tin pa e ingresonan un suma di 111 miyon florin pa cual ainda no a tuma ningun decision. Pa e motibu aki ta existi un riesgo real cu e aumento di ingreso lo retrasa y por lo tanto lo surgi un escasez. Por cierto Aruba ta pone demasiado enfasis riba aumento di e ingresonan pa logra un surplus presupuestario. Di punto di bista di finansas publico sostenibel ta importante pa reduci gasto. Aruba mester presenta un presupuesto mas pronto posibel na Parlamento di manera cu por aproba esaki awor sin retraso.  

GASTONAN PERSONAL 

Conforme e protocol di cooperacion Aruba-Hulanda 2019 di dia 22 di november 2018, titula: “Marcando e caminda pa finansas gubernamental solido, transparente y sostenibel”, Aruba mester reduci e gastonan di personal anualmente cumisando for di januari 2019. Y pa aña 2020 a keda palabra cu e gastonan di personal incluyendo e gastonan di e doñonan di trabou lo yega te na un maximo di 476 miyon florin. Esaki ta inclui e gastonan di personal pa e Fondo Presupuestario Provisional pa e Plan di Crisis Social (IBSCP). Si logra realisa esaki, e gastonan excesivo di personal lo baha pa prome bes den tantisimo aña. Esaki ta un paro importante di e tendencia. E hustificacion di e estimacion di e gastonan aki mester mehora, di manera cu ta bira mas cla di cual forma e bahada nominal lo continua pa varios aña.  

REFORMA FISCAL 

E reforma fiscal cu a inicia aña pasa, ainda tin retraso. E meta ta pa cambia e sistema di cobra impuesto, y si ta posibel simplifica esaki. CAft ta subraya cu ta urgente pa tuma e decisionnan tocante e reforma fiscal mas pronto posibel. Ademas ta hopi importante pa a corto plaso tuma e medidanan adicional pa garantisa cu esnan cu tin debe di impuesto y prima, paga esakinan tambe.   

 

CAft a haci un bishita na Aruba dia 13 y 14 di februari. A tene combersacionnan cu Gobernador, Ministro di Finansas, Asunto Economico y Cultura, Ministro di Husticia, Siguridad y Integracion, Conseho di Ministro y Parlamento. CAft a papia tambe cu e Directiva di Banko di Seguro Social (SVB). 

 

 

  • Powered by SETAR