Maduro: Lo por cuminsa trata presupuesto 2020 na maart

ORANJESTAD – Parlamento lo por cuminsa cu tratamento di presupuesto 2020 na comienso di maart di e aña aki, envez di e palabracionan anterior di januari y despues februari (esta e luna aki). Asina minister di finanza Xiomara  Maduro a bisa noticiacla.com diahuebs. Motibo di e tardansa ta cu e presupuesto ta ‘’pega’ na Raad van Advies ainda. Hulanda mientrastanto a duna Aruba te februari (segun Evelyn Wever Croes na e portal aki) pa trata e presupuesto, despues no a logra haci esaki na januari 2020 segun palabracion anterior. 

KICO A PASA

“Nos a bisa cu nos ta calcula cu pa februari nos ta brinda e ley na Parlamento y e ora por trata e ley ainda den februari” Maduro a admiti diahuebs.” Pero como cu nos no a haya e conseho di RvA ainda, tur cos ta mustra cu ta comienso di maart (2020:red) e tratamento di presupuesto door di Parlamento lo bira posibel” Maduro a sigui bisa. No ta conoci si Hulanda lo acepta e ‘fecha’ nobo aki y si e por tin consecuencia pa Aruba. E colegio di supervision financiero CAFt a haya e concepto caba, te cu nan a comenta ariba. Awor nan ta warda e parti final pa wak si esaki ta keda conforme e palabracionan cu Hulanda y si e consehonan di CAFt ta figura den dje. Pa ley, presupuesto di Aruba mester ta entrega pa 1 di September di e aña anterior. Pero si esey no sosode y si aña habri sin cu tin un presupuesto aproba, por usa un porcentahe di e suma anterior. CAFt mientrastanto conforme e ley di LAFt a stipula cu e presupuesto mester ta aproba pa tanto Parlamento como firma pa gobernador pa mas tarda 15 di December di e aña anterior. Algo cu no a sosode ultimo dos pa tres aña, pero esaki tabata cu consentimento di Hulanda.