Warda Costa ta aumenta patruya durante periodo di carnaval

ORANJESTAD - Warda Costa lo tin mas patruya riba laman durante periodo di carnaval. Asina e vocero ta raporta diaranson. For di experiencia di pasado, ta conoci cu durante di carnaval, e cantidad di actividad ilegal riba laman ta aumenta. Durante e periodo aki, mas boto ta haci intento pa yega tera cu contrabanda. Pesey durante di e periodo di carnaval cu ta bin, Warda Costa ta bay controla y patruya mas cu e meta pa detene botonan sospechoso. Abo como ciudadano alerta tambe por yuda Warda Costa. Na e momento cu bo mira algo sospechoso riba laman of na costa, bo por yama Warda Costa riba e number 913. E number aki ta alcansabel dia y anochi.