Corte: Utilities mester paga Frank Hoevertsz casi cuart miyon florin

Corte: Utilities mester paga Frank Hoevertsz casi cuart miyon florin

Posted on 02/11/2020 11:11 am AST | Updated on 02/11/2020 11:19 am AST

ORANJESTAD – Corte a ordena Utilities NV pa paga e ex director Frank Hoevertsz e suma di 416.350,= florin menos e suma ya paga di 160.540.=, cu ta bira finalmente e suma di 249.810,= florin como pago di salida como director. Asina e sentencia dicta diaranson mainta ta bisa. Na mei 2019 corte a dissolve e contracto di trabou entre e dos partidonan aki, pa cual corte a otorga Hoevertz e suma inicial di 160.540 como un ‘voorschot’ riba e suma total cu el a pidi di casi mei miyon florin. 

CASO 

E caso a tuma lugar na December di 2019, unda cu partidonan a argumenta nan banda respectivo. Segun Utilities, Hoevertsz no ta cualifica pa haya e pago solicita, pasobra ta considera e contract como nulo. Y consecuentemente Hoevertsz no ta bin na remarke pa e suma menciona of cualkier otro suma. Corte a disputa esaki y a duna abogado di Hoevertsz, David Kock su rason. E argumento di Utilities cu Hoevertsz a keda nombra politicamente y no a actua corecto na interes di e compania, sino mas bien a complace gobierno anterior ciegamente, no ta un punto cu corte ta toca. 

HUZGA VALIDEZ CONTRACTO

De hecho, corte a mustra cu no ta na dje pa determina si Hoevertsz a keda nombra politicamente  of retira politicamente ya cu ta cultura politico di Aruba cu cosnan asina no ta inusual. E tarea di corte tabata meramente pa establece si e contracto entre partidonan tabata legal y cu si partidonan a tene nan mes na esaki. Y mientras cu Corte no tabata completamente di acuerdo cu cierto argumento di Hoevertsz pa cu e suma solicita, a dune razon y a otorgue e suma final di 249.810, cu ta e suma despues di kita e loke cu el a haya paga caba aña pasa. Acerca lo bin e suma di interes acumula desde 10 di juni 2019 te cu awor. E suma ey, no ta menciona den e sentencia. Por lesa e sentencia completo AKI

  • Powered by SETAR