Segun encuesta, mayoria a rechasa trabou cu SMAC ta haciendo

ORANJESTAD – Segun un encuesta haci pa Noticiacla.com recientemente, mayoria di esnan encuesta (1.511 persona) kier cambio den e organisacion di carnaval. E pregunta haci tabata ‘Ken bo ta haya cu mester guia carnaval di Aruba. Y e 2 opcionan duna, tabata e fundacion actual SMAC, of si mester a trece esun anterior bek, esta SAC. Despues di 3 dia di votacion, 1.300 persona a vota pa SAC (87%) y 211 (13%) a vota pa SMAC, esta e fundacion actual. Esey kier men cu si bay tras di e resultado aki, mayoria ta rechasa e trabou cu e fundacion actual ta haciendo. E no ta un encuesta official, sino simplemente un indicacion publico di kico ta biba den comunidad. 

REACCION

Fuera di e votonan, hopi a tuma tempo pa comenta riba e encuesta. Mayoria ta pidi pa SAC y cu esey, pa trece e presidente Tecla Kelly bek. Otronan ta considera cu mester uni SMAC Y SAC y bou di condicionan estricto, laga nan traha hunto na bienestar di Aruba. Tin ta pensa cu creacion di SMAC, a laga politica infiltra den carnaval. Tambe tin esnan cu ta pensa cu SAC tabatin su tempo y cu si a bin cu SMAC pasobra cu SAC tabata asina malo, pakico kier e mesun SAC aki bek. Y tin esnan cu ta pensa cu un poll asina, ta crea solamente mas polemica den carnaval. E intencion di e pollnan ta simplemente pa ‘pols’ loke ta biba den comunidad di Aruba, sin distinccion y sin otro meta su tras. Keda pendiente pa e proximo poll.