Trabou pa converti 'Kill Cage' den un ‘Centro di control di Cacho’ a cuminsa!

ORANJESTAD – Despues di hopi luna di preparacion, a cuminsa e trabounan fisico pa transforma loke ta conoci como e ‘kill cage’ pa un ‘centro di control di cacho’. Noticiacla.com tabata presente y a mira e trabounan inicia diamars mainta.  Ta intencion pa dentro di poco, por keda cla cu e centro aki pa asina cuminsa implementa e plan nacional cu ta atende cu problema di cacho riba caya. For di e personal di DOW, a compronde cu trabounan lo dura 30 dia. Cu e paso aki tambe, ta kita e lugar cu a causa hopi publicidad negativo pa Aruba, local y internacional. Unabes cu ta cla cu e necesidadnan basico pa e centro, manera awa y cuminda pa e cacho, lo inaugura e lugar den su formato nobo. 

SITUACION DI ARUBA

Manera ta conoci, na Aruba nos tin hopi doño di mascota cu na momento cu nan no kier ta doño mas di nan mascota, ta deshaci di nan door di laga nan atras na e facilidad cu a haya e nomber di ‘kill cage / afmaakhok’, cu ta existi pa mas cu 40 aña caba. Mascotanan cu niun fundacion di bestia a y ta logra rescata di eyden, ta wordo poni drumi door di Veterinaire Dienst (un departamento di gobierno cu ta resorta bow di departamento di salubridad publico).

IMAGEN NOBO

Gobierno anterior a pasa e ley di cacho (2015), pero no tabata cla cu tur rekisito pa cual a bira dificil pa implementa e ley cu su forza completo pa ta realmente efectivo. Awor gobierno actual a pone mas enfasis riba e plan aki y a tuma paso pa crea e ‘centro’ aki conforme e Ley di Cacho. Cu creacion di e Centro di Control di Cacho, ubica na e mesun luga aki, lo elimina e imagen di ‘kill cage’ pasobra tur cacho cu yega e luga aki lo wordo atendi conforme e ley di cacho. Keda pendiente pa e detayes di e operacion aki pa tur hende ta na altura con esaki lo funciona exactamente.