Aunke mas vuurwerk cu normal na caminda, por tin escases toch

ORANJESTAD – Cu e.o. un container di vuurwerk yegando laat, y un container cu a drenta sin e documentonan necesario, e ta pinta e situacion di vuurwerk e aña aki como uno yen di problema. NoticiaCla.com a compronde cu esaki ta apenas e comienso, mirando cu tin mas problema na caminda. A compronde cu tin un cantidad mas grandi (cu normal) di container di vuurwerk na caminda. E cantidad exacto no ta conoci di container na caminda. E hecho cu e containernan (mayoria di nan) ta yegando laat cu por tin su retonan cune.

Pa loke ta esun cu a drenta sin documento necesario, esaki por tin consecuencia pa e importado aki. NoticiaCla.com a haya confirmacion cu e container aki ta riba wela en espera di kico e siguiente pasonan ta cu lo wordo tuma

Na e altura nan aki, normalmente lo mester tin tur container di vuurwerk aden caba, pa asina nan por wordo controla, procesa y warda na e deposito na Wela. E biaha aki cos a cambia debi na un problema cu China, cu a pone cu e containernan (mayoria) ta yegando Aruba laat (den december). Esey ta pone cu lo tin un problema cu control di tur e vuurwerk, cu por conduci na un limitacion di container di vuurwerk cu por haya ‘luz berde’ pa sali riba mercado. Sin control, vuurwerk no por sali di Wela, y consecuentemente no por wordo bendi.

Comision di vuurwerk algun tempo pasa, a implementa un maneho di gobierno cu ta indica cu tur container di vuurwerk mester ta na Aruba prome cu december. Esey ta nifica cu no por tin ningun container di vuurwerk riba waf den luna di december. E aña aki cos ta diferente ya cu tin retraso formal di e containernan. Apenas uno a yega, y un otro cu a yega, ta pega riba wak, den beslag di DOW, pa motibo cu e papelnan no ta na ordo.

NoticiaCla.com a compronde cu e comision di vuurwerk a logra convence minister encarga pa cambia e maneho pa e biaha aki, pa por tin e containernan yega toch den december. Sinembargo e no ta soluciona e situacion mes, pasobra lo tin un cantidad grandi cu ta yega pareu, cu ta hacie dificil pa por controla tur cos na tempo. Esey ta nifica cu solamente esnan controla por sali (manera indica caba), cu por traduci den scarsedad di vuurwerk e aña aki na Aruba, no obstante e hecho cu tin un cantidad mas grandi di vuurwerk na caminda pa Aruba.