Minister ta pidi despensa publico na famia di Zinnia Croes

ORANJESTAD – E mandatario di husticia Andin Bikker a informa e portal aki noticiacla.com cu pasonan a keda tuma y ta den proceso pa trece solucion pa loke ta e polis cu a causa morto di e criatura Zinnia Croes casi cinco aña pasa. Mes momento el a manda palabra di despensa na e famianan pa no a informa nan mas riba e ‘actualisacion’ di loke el a haci riba e tema aki. E ta mustra cu ta pasobra tin asina hopi cos cu e ta haciendo cu por ta den e momento ey, no a ‘update’ e famia cu e informacion riba e caso specifico aki. Mes momento a mustra cu e caso aki ta diferente na esun cu el a pidi clarificacion di colega minister di Hulanda riba esun di e Arubiano Mitch Henriquez (dfm) cu tambe a muri 5 aña pasa. 

KEHO

E asunto ta referi na e keho recien di e famia di Zinnia Croes cu a cuestiona e hecho cu e minister a haci peticion na colega minister Hulandes riba e forma con ta tratando e asunto di Henriquez. Esaki siendo cu segun e famia, na Aruba mes e minister no ta haciendo loke el a priminti pa e caso di Croes. A resulta awor cu e minister a haci loke el a priminti, pero pa motibo di ta ocupa cu varios cos parew, e no a yega na comunica esaki cu e famianan di e criatura. “Mi ta pidi e persona concerni mi despensa pa esaki” e mandatario a bisa. Mes momento el a bisa si cu ta un caso diferente y no por compara e asuntonan aki. E caso di Henriquez ta unda cu Bikker ta cuestiona con Hulanda ta tratando e caso ey y cu no ta husto pa e famia. Na Aruba e caso di Croes, segun Bikker, ta den proceso di apelacion pa asina gobierno por logra mas contra e polis. Sinembargo, e portal aki a compronde di departamentonan concerni, cu huez a determina caba cu e polis den e caso Croes, no por wordo castiga dos biaha, cu ta nifica cu den e caso aki, e polis no por wordo kita di trabou, manera cu e minister a pidi pa sosode.