E bapor crucero Aida Perla lo drenta Aruba normal diasabra

ORANJESTAD - E bapor crucero Aida Perla lo ta drentando Aruba normal diasabra. Asina minister di turismo Dangui Oduber a informa diabierna atardi. Den e ultimo dianan aki APA a wordo aserca pa diferente partidonan riba e yegada di Aida Perla, cual tawata den noticia e ultimo simanan aki.  Por medio di esaki APA den coordinacion cu Minister di Salubridad, Turismo y Deporte, DVG, ATA, BRA y demas otro authoridad kier a informa lo siguiente.

Aida Perla lo yega Aruba conforme su itinerario normal. “Nos por informa cu tur pasahero cu ta abordo di Aida Perla ta pasaheronan nobo cu a embarka e cruiseship e siman aki” Oduber a bisa.

DVG ta vigila y monitorea activamente tur crucero pa medio di Maritime Declaration of Health (MDH), manera cu ya ta haciendo pa algun aña caba, dus esaki ta un procedura normal cu DVG ta ehecuta no unicamente cu Aida Perla, si no cu tur crucero cu ta yega Aruba. Riba e MDH tin tur informacion di tur cos cu tin di haber cu salubridad y esaki DVG ta controla pa cualkier iregularidad. Den caso di Aida Perla no tin ningun iregularidad y pesey tambe no tin problema pa e drenta Aruba.

“Pueblo di Aruba por keda trankil cu e yegada di Aida Perla y ta conta cu nos lo brinda nos bishitantenan e mesun bon servicio cu Aruba ta conoci pe” e mandatario a finalisa bisando.