Royal Caribbean a prohibi tur biahero cu e.o. pasaporte Chines pa subi nan bapor

Royal Caribbean a prohibi tur biahero cu e.o. pasaporte Chines pa subi nan bapor

Posted on 02/7/2020 5:39 pm AST | Updated on 02/7/2020 5:39 pm AST

NEW YORK – E liña di bapor crucero Royal Caribbean a prohibi tur biahero cu tin un paspoort Chines, di Hong Kong of Macau pa subi nan bapor, debi na preocupacion pa cu e coronavirus. E prohibicion ta conta pa cualkier persona cu tin e pasaporte aki, los di e hecho ki dia nan tabata den nan area di residencia. Adicionalmente no obstante e nacionalidad, cualkier pasahero of tripulante cu a biaha pa China, Hong Kong of Macau, of tabatin contacto cu un persona menos cu 15 dia prome cu nan subi e bapor, ta prohibi pa aborda. Cualkier persona cu tin keintura mes, of cualkier simptoma di griep, lo no wordo permiti pa subi abordo. E reglanan nobo a keda anuncia diabierna  ora cu Royal Caribbean a retrasa salida di un di nan bapornan na New Jersey despues cu 4 pasahero di e crucero anterior a wordo hiba hospital pa screening di e coronavirus. 

 

 

 

  • Turistanan den cuarentena den hotel na Tenerife pa coronavirus

    Turistanan den cuarentena den hotel na Tenerife pa coronavirus

    TENERIFE – Centenares di turista (entre nan 12 turista Hulandes) a wordo bisa pa keda den nan camber den un hotel riba e isla Spaño di Tenerife, parti di Islas Canarias diamars. E hotel, Costa Adeje Palace ta cera y den cuarantena despues cu un turista Italiano a keda contagia cu e virus corona dialuna anochi. 

  • Ex Productor popular di cine haya culpable pa abuso sexual

    Ex Productor popular di cine haya culpable pa abuso sexual

    LOS ANGELES – E ex productor di cine Mericano Harvey Weinstein a wordo haya culpable pa abuso sexual pa un grupo di hurado den corte, y por haya castigo minimo di 5 aña di prison pa 29 aña. Un cantidad di dama a denuncia Weinstein. Dia 11 di maart, huez ta dicta e castigo y e ora ta haya sa ki castigo Weinstein

  • Ex presidente di Egipto Hosni Mubarak a fayece

    Ex presidente di Egipto Hosni Mubarak a fayece

    CAIRO – E ex presidente di Egipto Hosni Mubarak a fayece na edad di 91 aña. Asina su yiu homber a confirma na prensa Egyipto. Mubarak tabata malo pa basta tempo caba. Na 2011 a bahe despues cu el a goberna pa 30 aña cu man duro. Su retiro forza tabata resultado di un serie di protesta conoci como ‘primavera arabe’ cu a inicia na 2010 na Tunisia. El a retira despues di varios siman di protesta riba e plaza Tahrir na Cairo. Na 2012 corte a sentenicia Mubarak na castigo di bida largo den prizon.  

  • Donald Trump a reduci castigo di prison di ex gobernador di Illinois

    Donald Trump a reduci castigo di prison di ex gobernador di Illinois

    CHICAGO – Un dia despues cu presidente Mericano Donald Trump a reduci sentencia di ex gobernador di estado di Illinois   Rod Blagojevich, el a tene un conferencia di prensa dilanti su cas. Blagojevich tabata sinta un castigo di prison di 14 aña pa soborno y fraude cu el a comete durante su periodo como gobernador. El a sinta 8 aña caba, pero awor por a bay cas. E ta considera su mes un fanatic grandi di Trump awor, siendo cu e ta pertenece na e partido Democrata (Trump ta republicano).  

  • Xander Bogaerts limita den spring training debi na lesion leve

    Xander Bogaerts limita den spring training debi na lesion leve

    FORT MYERS — E shortstop di Boston Red Sox, e Arubiano Xander Bogaerts lo ta limita den su prome dianan di entrenamiento inicial pa e temporada nobo di grandes ligas cu ta cuminsa aki dos luna. Asina e portal deportivo ‘mass live’ ta raporta. Segun e portal, Bogaerts a lesiona su mes na Aruba durante un session di ‘bulamento’ ora cu e tabata entrena algun siman atras. E prome dia di entrenamento ta cuminsa awe dialuna. “Su enkel ta un poco dolor” gerente interino Ron Roenicke (e gerente nobo no a keda apunta ainda despues cu a core cu esun anterior) a bisa. “Pues e dianan aki, por lo menos tres dia nos ta bay trankilo cu ne. Nada alarmante, pero e ta un poco dolor. Nos no ta bay ‘canse pa awor”. E hecho cu esaki ta spring training, no ta duna nan motibo pa forza nada’ Bogaerts a bisa. “Djis purbando pa sigura cu nos ta haci cos bon y ora cu mi cuminsa, mi por termina (e training) tambe”. 

  • Guinness a registra e cacho di mas grandi na mundo

    Guinness a registra e cacho di mas grandi na mundo

    NEW YORK – E instancia cu ta registra tur record mundial oficialmente, Guinness World Record, a registra e cacho di rasa Great Dane, Freddy na 7 pia y 6 inch como e cacho di mas grandi na mundo.  Claire Stoneman, doño di e cacho tabata sa cu e lo a bira mas grandi cu otro Great Dane, pero no tabata sa cu e lo bira esun di mas grandi. Pa no spanta hende y otro cachonan, ta cana cu ne hopi tempran mainta ora cu tur hende ta drumi ainda. E cachonan di rasa grandi aki ta conoci pa por mustra menasante pero nan ta considera como gigante trankilo cu ta gusta drumi y come.   

  • Powered by SETAR