Roberto Geerman: Reduci e periodo di carnaval di Aruba

ORANJESTAD – Reduci e periodo di carnaval, haci cierto adaptacion den e periodo aki, y carnaval por drecha pa miho. Asina conocido personahe di radio Roberto Geerman a bisa recientemente den e programa NoticiaCla LIVE. Moderador Tito Laclé a puntra Geerman con e ta haya e carnaval di awe y kico e lo cambia. E ta haya e carnaval su calidad no ta mescos mas manera antes. Y un problema grandi, ta cu e ta mucho largo. Si haci cambio eynan, cos por bira diferente.

LARGO

E hecho cu ta mara periodo di carnaval na diaranson di shinishi ta pone cu e periodo di carnaval na Aruba ta varia. Depende riba ki dia diaranson di shinishi cay, e periodo ta adapta na dje. Geerman ta sugeri cu mester coi e fecha di diaranson di shinishi, y bay bek 3 siman. Eynan ta cuminsa planea e periodo di carnaval, y ta percura pa hinca lo esencial aden. Esaki ta percura cu e ta bira mas calidad, menos largo y tambe menos costoso eventualmente. Sigur no mester cuminsa carnaval prome cu dia 6 di januari segun Geerman. 

PARADA

Tin hopi parada segun Geerman, pa no bisa demasiado. E luho a bay hopi y awor ta enfoca mas riba ‘ambiente’. Tempo di antes ora cu tabatin gruponan grandi no tey mas. E tempo cu turistanan tabata admira nos product di carnaval ta pa pasado. Awor e carnaval ta mas ambiente cu bunitesa. Nada malo cu e ambiente, pero mester corda riba e calidad tambe segun Geerman. 

TUMBA

Mientras cu e siman aki a logra ‘rescata’ tumba, Geerman ta kere cu no obstante, mester sigui cu e festival aki. E ta un cultura, e ta un custumber cu no por bay perdi. Si dicidi di cancela Tumba, mester cancela Tumberito, y esnan di mucha cu de facto casi nunca ta wordo toca den parada. Un solucion segun Geerman, ta pa cambia e periodo di tumba. 

CONOCEMENTO

Mientras cu Geerman ta admiti cu musicalmente e no tin ningun abilidad, su conocemento di historia musical local, ta dune un peso enorme cu ta pone cu hopi ta solicita su presencia ora di programanan carnavalesco.