DVG ta desmenti cu a prohibi jet cu Chines aterisa na Aruba

ORANJESTAD – Departamento di Salud ta desmenti cu autoridad di Aruba (DVG ) den e caso aki lo a nenga un jet europeo cu varios Chines abordo di baha na nos aeropuerto. Asina e vocero di e departamento Jurret Croes a sigura e portal aki. E portal Caribbean News Digital ta raporta cu Aruba a nenga e avion, pa motibo di coronavirus. “E caso aki no ta conosi serca nos na DVG” Croes a bisa. E ta algo cu mester a sosode siman pasa. 

DESMENTI

“ DVG na ningun momento a wordo aserca pa directie luchvaart pa advies riba un posibel avion cu mester baha” Croes a sigui bisa. “ Di nos parti nos a tuma contacto cu DCA y ANSA y nan tampoco ta na altura di ningun avion cu a wordo nenga” e vocero a sigui bisa. E avion en cuestion ta un jet tipo gulfstream BWJ033 GLF6, di matricula N666HD cu tabata procedente di China, pa Islandia y despues islanan den Caribe. Aruba lo tabata e destinacion final. 

REPUBLICA DOMINICANA

E informacion ta bisa cu e avion lo a haya permiso pa baha na Republica Dominicana solamente cu e condicion cu ta refuel e avion so y cu ningun hende tabata permiti pa baha di e avion. Abordo lo mester tabatin 12 chines. 

ISOLACION

Mientrastanto e weekend aki ta cumpli un siman cu un famia Chines di 4 persona a yega Aruba y ta den cuarentena pa motibo di e coronavirus. Nan a yega cu avion di KLM for di Hulanda despues di a pasa nan dianan liber (Aña nobo Chines) na China. A opta pa isola nan pa nan propio seguridad y di nos isla pa un periodo di dos siman na Hospital Horacio Oduber. Diasabra ta cumpli e prome siman di e cuarentena aki.