Lejuez: A para pa loke ta corecto y awor a haya rason den caso Serlimar

ORANJESTAD – Tin biaha bo tin cu para pa loke ta corecto, pero e por nifica cu bo lo tin cu para bo so e ora. Asina parlamentario Daphne Lejuez ta bisa den un reaccion riba e retiro di e director di Serlimar. Lejuez ta e parlamentario cu a bandona partido MEP ora cu el a haya presion pa cu e ley di Serlimar aña pasa. E director mientrastanto a wordo manda cas e siman aki y Lejuez a reacciona riba e asunto aki. 

INTERES GENERAL

Segun Lejuez, e trabou di un Parlamentario ta encera sirbi e interes general di pueblo, treciendo semper na claridad cosnan cu ta robes. “ Aunke e cultura di politica bou di nivel ta domina den nos actual Parlamento ainda, no ta cambia mi pensamento di para pa loke bo ta kere aden, hasta si esey nifica para bo so. Despues di a wordo tilda di sirbi interes propio enbes di interes general ora mi a vocifera cu mi lo no sostene pa pasa un ley pa aloca mas recurso financiero directamente pa Serlimar, awe e berdad ta sali na cla cu e maneho financiero di e compania estatal aki ta desastroso” Lejuez a bisa.

RETIRO DI DIRECTOR

Cu retiro repentino di su director, na e momentonan aki no solamente e maneho financiero di Serlimar ta wordo cuestiona segun Lejuez, pero mirando e molester den e becindario di Parkietenbos y Sero Teishi, tambe e capacidad di e compania pa carga e responsabilidad ambiental manera e ley tabata defini. Esaki no solamente pa falta di recurso financiero, sino tambe pa falta di liderazgo responsabel y experticio riba e tereno ambiental y di reciclahe.

LEY AMBIENTAL

Segun Lejuez, loke e sucedido ta subraya ta cu mas cu nunca Aruba mester urgentemente di un ley ambiental (milieuwet) cu ta regula y stipula maneho di departamento y compania publico (manera Serlimar, DNM, DOW y otronan) y tambe di esnan priva, pa asina nos tur hunto por traha pa logra un Aruba sostenibel, duradero, saludabel y den harmonia cu su habitantenan y naturalesa.

MIHO GUIA

“Na final di dia Serlimar y su empleadonan merece un miho guia y un maneho profesional unda ta observa y atene na principionan di bon gobernacion (good corporate governance) y leynan ambiental na nivel nacional y internacional, pa asina brinda mas stabilidad, siguridad y sostenibilidad na e compania estatal, su empleadonan, clientenan y unda ta proteha e bienestar general di Aruba, su naturalesa y e salud di su hendenan” Lejuez ta finalisa bisando.